Bu gün (26 sentyabr) Yasamal rayon Məhkəməsində hakim Mətanət Hacıyevanın sədrliyi ilə bir qrup Gənclər təşkilatının İctimai Televiziya və Radio Verilişləri Şirkətinə (İTV) qarşı müraciətə cavab verilməməsinin qanunsuz hesab olunması və müraciətə cavab verilməsi vəzifəsinin cavabdehin üzərinə qoyulmasına tələbinə dair məhkəmənin hazırlıq iclası keçirildi.
İddiaçılardan C. Rəsulun nümayəndəsi G. İsmayılova və A. Rail hər ikisi iddialarını müdafiə etdiklərini bildirdilər və iddianın təmin olunmasını məhkəmədən xahiş etdilər.
Cavabdehin nümayəndəsi T. Məmmədov iddianın təmin edilməməsini məhkəmədən xahiş etdi. O eyni zamanda müraciət edilən sorğuya cavab verilməsi üçün konkret ünvanın göstərilmədiyini qeyd etdi.
İddiaçı R. Cəfərovun nümayəndəsi G. İsmayılova bununla razı olmadığını deyərək, göndərilən məktubun üzərində müraciətə cavab verilməsi üçün ünvanın göstərildiyini hakimə bildirdi.
Hakim M. Hacıyeva işin məhkəmə baxışı zamanı müraciətə yazılı şəkildə verilmiş cavabı iddiaçılara təqdim etməyi İTV-nin nümayəndəsinə təklif etdi və məhkəmə baxışını 17 sentyabr saat 16:00-a təyin etdi.
Xatırladaq ki, bir qrup Gənclər təşkilatı 20 may 2011-ci il tarixdə İctimai Televiziya və Radio Yayımları Şirkətinin Baş direktoru İsmayıl Ömərova müraciət edərək son dövrlərdə Azərbaycanda gənclərin əsassız və qurama ittihamlarla həbslərlə bağlı gənclərin öz mövqelərinin əks olunacağı (ittiham tərəfinin nümayəndəsi ilə birgə) süjet və ya ayrıca veriliş hazırlamağa, yaxud birbaşa çıxış üçün qısa müddətə olsa da belə efir vaxtı ayırmağa göstəriş verməyi xahiş etmişdilər. Lakin müraciətə heç bir əsas göstərilmədən cavab verilmədiyindən Gənclər təşkilatları Yasamal rayon Məhkəməsinə müraciət ediblər.