Daha sonra Qənimət Zahid çıxış edərək bildirdi ki, o artıq cəzasının 2 il 6 ayını çəkib və prezidentin sərəncamı ilə əfv edilib. Buna görə də o hakimdən üzərindən məhkumluğun götürülməsini və ərizəsinin təmin edilməsini xahiş etdi.
Dövlət ittihamçısı Şahin İsmayılov bildirdi ki, Qənimət Zahid kifayət qədər islah olunmayıb. Həm də, qanuna görə 3 il müddət keçməlidir və əgər islah olunmasını təsdiq edən sübutlar olarsa Qənimət Zahidin məhkumluğu vaxtından əvvəl üzərindən götürülə bilər. Prokuror belə sübutların iş materiallarında olmadığını və iddianın təmin edilməməyini məhkəmədən xahiş etdi.
Qənimət Zahid isə bildirdi ki, “Azadlıq ” qəzetinin əməkdaşları tərəfindən təsdiq edilmiş akt və “Azadlıq” qəzeti tərəfindən verilmiş xasiyyətnamə iş materiallarında var.
Daha sonra hakim müşavirəyə getdi. Qərar sentyabrın 16-da saat 10:00 – da elan ediləcək .
Xatırladaq ki, Qənimət Zahid Cinayət Məcəlləsinin 127.2.3 ( xuliqanlıq niyyəti ilə qəsdən sağlamlığa az zərər vurma ) maddəsi ilə ittiham olunaraq 3 il 6 ay, Cinayət Məcəlləsinin 221-ci maddəsi ilə ittiham edilməklə isə 6 ay olmaqla ümumilikdə, 4 il müddətində azadlıqdan məhrum edilmişdi. Azərbaycan Respublikasının Prezidentinin 17 mart 2010-cu il arixli əfv sərəncamı ilə azadlığa buraxılıb.
“Azadlıq” qəzeti 1989-cu ildən çıxır və gündəlik qəzet kimi fəaliyyət göstərir.