Bu gün (26 may) Nəsimi rayon Məhkəməsində hakim İkram Şirinovun sədrliyi ilə Reportyorların Azadlıq və Təhlükəsizlik İnstitutunun (RATİ) sədri Emin Hüseynovun polis təzyiqinə məruz qalması ilə bağlı Daxili İşlər Nazirliyinə (DİN), Nəsimi rayon Polis İdarəsinə (RPİ) və Nəsimi rayon Polis İdarəsinin 22-ci Polis Bölməsinə qarşı qaldırdığı iddia üzrə məhkəmə prosesi keçirildi.
Məhkəmə prosesində iddiaçı E.Hüseynovun və onun vəkili Elçin Sadıqov, cavabdeh tərəfdən 22-ci Polis Bölməsinin vəkili Məzahir Şahbazov iştirak edirdilər.
Məhkəmənin səyyar keçirilən birinci hissəsi “Alaturka” kafesinin qarşısında baş tutdu. Amma kafe bağlı olduğundan içəri keçmək mümkün olmadı. Habelə hadisə yerində şahidlər də dindirilmədi. Daha sonra proses Nəsimi rayon Məhkəməsində davam etdi.
Prosesin ikinci hissəsində vəkil E.Sadıqov vəsatət qaldıraraq hadisə zamanı (2008-ci il iyunun 14-də “Alaturka” kafesində tədbirin dağıdılması) çəkilən video görüntülərə məhkəmədə baxılmasını xahiş etdi. Vəkilin bu vəsatəti təmin edildi və video görüntülərə baxış keçirildi.
Sonda hakim İ.Şirinov tərəflərin yekun çıxışlarını yazılı şəkildə məhkəməyə təqdim etmələrini tələb etdi və prosesi iyunun 9-u saat 16:30-a təyin etdi.
Xatırladaq ki, E.Hüseynov 14 iyun 2008-ci il tarixində “ Alaturka” restoranında “Çe Gevara Fanatları Klubu”-nun keçirdiyi tədbir dağıdılarkən, 22-ci Polis Bölməsində fiziki və mənəvi təzyiqlərə məruz qalıb. Polisin təzyiqi nəticəsində huşunu itirən Emin Hüseynov 20 gündən artıq xəstəxanada müalicə alıb və müalicəsini indi də davam etdirməkdədir.