Reportyorların Azadlıq və Təhlükəsizlik İnstitutunun (RATİ) sədri Emin Hüseynov fevralın 1-də axşam saatlarında Heydər Əliyev adına Hava Limanının Gömrük nəzarət məntəqəsində Dövlət Gömrük Komitəsinin təhqir və təzyiqləri ilə üzləşib. Bu barədə Hüseynov fevralın 2-də Reportyorların Azadlıq və Təhlükəsizlik İnstitutunun mətbuat mərkəzində keçirdiyi mətbuat konfransında məlumat verib.
“Gömrük nəzarəti məntəqəsində böyük növbə var idi. İnsanları, ən əsası isə “blackberry” telefonu gətirən şəxsləri saxlayırdılar. Hər bir telefon üçün qanunsuz olaraq 75 manat rüşvət alırdılar. Hətta qadınların əyinlərində olan şubaların təzə və ya köhnə olduğu ilə maraqlanırdılar. Əksər insanları saxlayırdılar və onlarla gizli sövdələşmə apardıqdan sonra onları buraxırdılar. Mənə gömrükdə bildirdilər ki, mən bəyannamə yazmalıyam və mən də razılaşdım. Mən Dubaydan özümlə bir neçə avadanlıq gətirmişdim. Onları da bəyannamədə qeyd etdim. Mən özümlə iki ədəd televizor, 2 ədəd mobil telefon, maşın üçün bir neçə lampa və maşın maqnitofonu gətirmişdim. Azərbaycandan gedərkən özümlə iki ədəd işlənmiş kamera aparmışdım ki, orda onlara uyğun yaddaş kartlarının yerləşdirilməsinin mümkünlüyünü sınayım. Onlar mənə bildirdilər ki, mən özümlə apardığım iki kameranı da və hətta özümə aid olan 3 ədəd telefonu da bəyannaməyə qeyd etməliyəm. Mən bəyannaməyə özümlə apardığım əşyaları da yazdım. Buna baxmayaraq mənə əsaslandırılmış şəkildə rüsum məbləğini təqdim etmədilər və əşyalarımın müsadirə olunduğunu bildirdilər” – deyə Hüseynov bildirdi.
Emin Hüseynov onu da bildirdi ki, gömrüyün 10 nəfərə yaxın əməkdaşı tərəfindən qeyri-insanı rəftara məruz qalıb və ona hüquqları izah olunmadan, hal şahidlərinin iştirakı olmadan, protokol tərtib edilmədən şəxsi əşyalarına da baxış keçirilib.
“Hətta bir nəfər əlində bıçağı fırlada-fırlada sifətimə yaxınlaşdıraraq “ə, nə qanun-qanun salıbsan? ” deyə məni hədələdi də. Bütün bu baş verənləri azı 20 təhlükəsizlik kamerası da çəkib” – deyə qeyd edən Hüseynov 2-ci qrup əlil olmasına baxmayaq əşyalarını gömrük işçilərinin təkidi ilə ora-bura daşıdığından səhhətində də ciddi problemlərin yarandığını və hava limanında həkimə müraciət edərək iynə-dərman qəbul etdikdən sonra özünə gəldiyini bildirdi.
Sonda Emin Hüseynov bildirdi ki, bu məsələ ilə bağlı ilk olaraq Gömrük Komitəsinin rəhbərliyinə müraciət edəcək və əgər nəticə əldə olunmasa, o zaman məhkəməyə müraciət edəcək və işi Avropa Məhkəməsinə qədər apararaq ədalətin bərqərar olunmasına çalışacaq.