Fevralın 2-də Bakıdakı Bayraq meydanında Fövqəladə Hallar Nazirliyinin əməkdaşları və ərazinin mühafizəçiləri tərəfindən “Turan” İnformasiya Agentliyinin və “Obyektiv” TV-nin əməkdaşı Rasim Əliyevə, habelə “Amerikanın səsi” radiosunun Azərbaycandakı təmsilçisi Tapdıq Fərhadoğluna təzyiq edilib. Jurnalistlər itələnərək ərazidən uzaqlaşdırılıb və qeyri etik ifadələrlə təhqir olunublar.
Belə ki, səhər saat 6-da bayrağın bərkidildiyi qüllə milinin yuxarı hissəsi laxlamağa başlayıb və onun aşma təhlükəsi yaranıb. Bayraq yerə endirilib və hadisə yerinə alpinistlər gəlib. Onlar qülləyə qalxaraq onu bərkidiblər. Hətta yaxınlıqdakı iki 9 mərtəbəli binanın sakinləri evakuasiya olunublar.
Qeyd edək ki, Bayraq meydanı 3 ilə tikilib. Meydanın ərazisi 60 hektar,onun yuxarı hissəsi isə 31 min kvadrat metr təşkil edib. Bayrağın ölçüləri 35 X 70 metrdir. Bayraq dirəyinin pyedestaldan hündürlüyü 162 metr, dəniz səviyyəsindən hündürlüyü isə 192 metrdir.
2010-cu il mayın 29-da “Ginnesin rekordlar kitabı” təşkilatı Azərbaycanın dövlət bayrağının dünyada ən böyük bayraq olduğunu təsdiqləyib