Penitensiar xidmətin Vərəmli Məhkumlar üçün İxtisaslaşdırılmış Müalicə Müəssisəsində müalicə olunan “Bizim Yol” qəzetinin əməkdaşı Müşfiq Hüseynovun səhhəti ağır olaraq qalır.
Bu barədə Reportyorların Azadlıq və Təhlükəsizlik İnstitutuna Müşfiq Hüseynovun qardaşı Sərvər Hüseynov məlumat verib. Onun sözlərinə görə, bu gün (01 dekabr) Müşfiq Hüseynov ailəsi ilə telefon əlaqəsi saxlayaraq, “Bizim yol” qəzetində onun səhhəti ilə bağlı dərc olunmuş məqaləyə münasibət bildirib. Qeyd edək ki, sözügedən məqalədə hüquq müdafiəçisi Leyla Yunus Müşfiq Hüseynovun səhhəti ilə əlaqədar azad olunmasının vacibliyi barədə açıqlama verib. Penitensiar Xidmətdən isə bildiriblər ki, Müşfiq Hüseynovun səhhəti normaldır və müalicə olunur. Məqələni oxuyandan sonra evə zəng edən Müşfiq Hüseynov Penietensiar Xidmətin münasibətinə kəskin narazılıq bildirib. “Müşfiq bildirib ki, Penitensiar Xidmətin qəsdi məni öldürməkdir. Çünki bu xəstəlik adətən bir neçə günlük müalicədən sonra yaxşılığa doğru effekt verir. Müşfiqin vəziyyətində isə iki aya yaxın müalicə heç bir effekt verməyib. Müşfiq deyir ki, təkid etməsinə baxmayaraq, müalicəsinin kursunu dəyişmək istəmirlər. Müşfiq istəyir ki, kənardan, lazım gələrsə xarici ölkədən müstəqil həkimlər dəvət olunsun və müalicə müəssisəsində onu müayinə etsinlər. Müşfiq onu da xüsusi vurğuladı ki, müalisə müəssisəsinə köçürüldükdən sonra orada 3 nəfər dünyasını dəyişib” – deyən Sərvər Hüseynov əlavə edib ki, bazar günü (29 noyabr) Müşfiq Hüseynovla görüşüb. Müşfiq xəstəxanada ona olan münasibətdən şikayət etməsə də, lazımi müalicə kursu təyin olunmamasını və standart müalicə aparıldığını vurğulayıb. “Müşfiqin vəziyyətində yaxşıya doğru heç bir yenilik yoxdur. Xəstəliyin inkişaf prosesi dayanmayıb. Digər tərəfdən, xəstəliyin rezistent (daimi) ya da sağalan olub-olmamasını yoxlamaq üçün verilən analizin cavabı uzun vaxt tələb etdiyindən, dekabrın ortaları bilinəcək. Müalicənin düzgün istiqaməti yalnız ondan sonar təyin olunacaq. İki aya yaxın müalicə müddətində Müşfiqin temperaturu bir dəfə də olsun normal olmayıb – 38-dən aşağı düşməyib. Bu isə vərəmin xroniki olma ehtimalını artırır. Əvvəllərdə olduğu kimi, Müşfiq halsızlıqdan, iştahsızlıqdan, zəiflikdən əziyyət çəkir. Çəkisində azalma davam edir” – deyə S.Hüseynov bildirib.
Hüquq müdafiəçisi Novella Cəfəroğlu RATİ-yə bildirib ki, monitorinq qrupu toplaşaraq Müşfiq Hüseynovla bağlı məsələni müzakirə edib: “Müşfiq Hüseynovun səhhətindəki problem bizi də narahat edir və buna görə də Ədliyyə Naziri Fikrət Məmmədovla görüşüb onun azadlığa buraxılmasına nail olmaq istəyirik”.
İşgəncələr Əleyhinə Azərbaycan Komitəsinin sədri Elçin Behbudov isə Müşfiq Hüseynovun əfv olunması ilə prezidentə müraciət etdiyini, həmçinin yaxın günlərdə onunla görüşəcəyini bildirib.
Xatırladaq ki, “Bizim yol” qəzetinin əməkdaşı M.Hüseynov 2007-ci il iyulun 24-də həbs olunub. Ona qarşı CM-nin 311-ci maddəsi (rüşvət alma ) ilə ittiham irəli sürülüb və 2008-ci ilin yanvar ayında o 6 il müddətinə azadlıqdan məhrum olunub. Bakı Apellyasiya Məhkəməsi isə M.Hüseynovun cəzasını 1 il azaldıb. Vərəm xəstəliyindən əziyyət çəkən M.Hüseynov 1 ay yarım əvvəl – oktyabrın 14-də cəza çəkdiyi 2 saylı cəzaçəkmə müəssisəsindən Penitensiar xidmətin Vərəmli Məhkumlar üçün İxtisaslaşdırılmış Müalicə Müəssisəsinə köçürülüb.
Qeyd edək ki, “Bizim yol” qəzeti 2003-cü ildən çap olunur və gündəlik qəzet kimi fəaliyyət göstərir.
