A.Hacızadənin atası Hikmət Hacızadə də mayın 30-da oğlu ilə görüşüb. Bu barədə RATİ-yə məlumat verən ata Hacızadə də oğlunun səhhətindən və saxlanma şəraitindən narazı olmadığını qeyd etdi.
“Azadlıq” qəzetinin məlumatına görə isə gənc bloqçular “ANTV-Onlayn”ın layiq görüldüyü “Gerd Buserius adına “Şərqi Avropada azad mətbuat” mükafatı bloqçuların ailələrinə çatacaq. Bu barədə ANTV-onlayn internet televiziyasının veb-redaktoru Mürsəl Əliyev açıqlama verib.
Qeyd edək ki, mayın 19-da Hamburq şəhərində Gerd Buserius adına “Şərqi Avropada azad mətbuat” mükafatının təqdimetmə mərasimi keçirilib. Azərbaycandan bu mükafata jurnalist Şahvələd Çobanoğlu və ANTV onlayn internet televiziyasi layiq görülüb. Laureatların hər biri 10 000 avro məbləğində pul mükafatı ilə təltif edilib.
Əlavə olaraq qeyd edək ki, 2000-ci ildən “Zite-Ştivtunq” fondu Gerd Buserius adına həvəsləndirici mükafatları şərqi Avropanın keçid dövrü yaşayan ölkələrinin mətbuat, söz azadlığı və liberal vətəndaş cəmiyyəti uğrunda mübarizə aparan jurnalistlərinə təqdim edir. 2004-cü ildən fond bu mükafatı Norveçin “Azad söz” fondu ilə birgə təqdim edir.
Xatırladaq ki, Emin Milli və Adnan Hacızadə 08 iyul tarixində axşam saatlarında dostları ilə Bakıda “Lebonese” (Livan) restoranında yemək yeyərkən qonşu masada onların söhbətini dinləyən idmançı görkəmli iki nəfər təxribatçı hücum edərək, Emin Milli və Adnan Hacızadəni döyərək, onlara xəsarət yetirib. Zərərçəkmiş şəxs qismində şikayət etmələrinə və xəsarət almalarına baxmayaraq, Səbail RPİ onlara xəsarət yetirənləri sərbəst buraxmış və döyülən gənclərin 48 saat müddətinə şübhəli şəxs qismində saxlanmasına qərar vermiş, iyulun 10-da isə Səbail rayon məhkəməsi “xuliqanlıq” maddəsi ilə təqsirləndirilən gənclər barəsində 2 aylıq həbs-qətimkan tədbirinin seçilməsi ilə bağlı qərar çıxarıb. İyulun 20-də Apellyasiya məhkəməsi sözügedən qərarı qüvvədə saxlayıb. Cinayət işinin istintaqı yekunlaşdırılıb və gənclərə qarşı 221.1.2 (xuliqanlıq) və 127 (qəsdən bədənə az ağır xəsarət yetirmə) maddələri ilə ittiham irəli sürülüb və iş baxılması üçün məhkəməyə göndərilmişdi. Noyabrın 11-də Səbail rayon məhkəməsi Emin Millinin 2 il 6 ay, Adnan Hacızadənin isə 2 il azadlıqdan məhrum edilməsi ilə bağlı qərar çıxarıb. Bakı Apellyasiya Məhkəməsi 10 mart 2010-cu il tarixdə hökmün qüvvədə saxlanılması ilə bağlı qərar qəbul edib.