Dünən (08 iyun) valideynləri 12 saylı cəzaçəkmə müəssisəsində cəza çəkən "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayevlə görüşüblər. Bu barədə RATİ-yə jurnalistin anası Gülşən Fətullayeva məlumat verib.
Onun sözlərinə görə, Fətullayev Söz Azadlığı Müdafiə Komitəsinin fəaliyyəti ilə maraqlanıb:
“Bizimlə görüşdə o, Söz Azadlığı Müdafiə Komitəsinin fəaliyyəti ilə maraqlandı və o, təşkilatın aksiya və jurnalistlərin müdafiəsi ilə bağlı tədbir keçirməməyinin səbəblərini soruşdu”, – deyə qeyd edən Fətullayeva habelə jurnalistin səhhətindən və saxlanma şəraitindən heç bir şikayətinin olmadığını söylədi.
“Bizdən bəzi kitabları ona çatdırmağımızı istədi. Gələn görüşdə biz istədiyi kitabları ona çatdıracağıq”, – deyə Fətullayeva vurğuladı.