Reportyorların Azadlıq və Təhlükəsizlik İnstitutu və Media Hüququ İnstitutu daha 3 jurnalistin Azərbaycan Cinayət Məcəlləsinin böhtan və təhqirə görə cinayət cəzası nəzərdə tutan maddələrinə əsasən məhkum edilmələrindən dərin narahatlıq keçirir və bunu qətiyyətlə pisləyir.
Qeyd edək ki, “Azadlıq Hərəkatçıları Birliyi”nin (AHB) sədri Təhmasib Novruzovun “Nota” qəzetinin 01-07 fevral 2009-cu il 04 (018) sayında “Təhmasib Novruzov kimlərin sifarişini yerinə yetirir”, 08-14 fevral 05 (019) sayında “ATM əməkdaşlarımızı ölümlə hədələyir!”, “MTN-in APA-dakı adamı kimdir?”, 22-28 fevral 2009-cu il 07 (021) sayında “Bəhlul Muradova daha bir cinayət işi qaldırdı”, 01-07 mart 08 (022) sayında “Anan ölsün ay Ramazan-2”, 08-14 mart 2009-cu il 09 (023) sayında “Sevil Nuriyevanın adının qəzetimizdə hallanmasını istəyən qüvvələr kimdir?” adlı məqalələrlə bağlı Sərdar Əlibəyli, Ramiz Tağıyev və Fərəməz Novruzoğlu barəsində qaldırdığı iddiaya əsasən 31 mart tarixində Xətai rayon Məhkəməsində hakim Toğrul Əliyev yazılmış məqalələrin yanlış olması ilə bağlı “Nota” qəzetinin təkzib verməsi, üzr istəməsi barədə qətnamə qəbul etmişdi. Qətnaməyə əsasən təkzib verməli olan “Nota” qəzetinin 05-11 aprel 2009-cu il tarixli sayında dərc olunan “Şərəfi tapdanmış, ləyaqəti alçalmış Təhmasib Novruzovdan üzrxahlıq yazısı” başlıqlı məqaləyə görə T.Novruzov yenidən xüsusi ittiham qaydasında iddia qaldırmış və cavabdehlərin CM-nin 147.2 və 148-ci maddələrinə əsasən xüsusi ittiham qaydasında cəzalandırılmasını tələb etmişdi. Sonradan iddia baxılması üçün Nizami rayon məhkəməsinə göndərilmiş və bu iddiaya əsasən bu gün cavabdehlər barədə hökm çıxmışdır. S.Əlibəyli və F.Allahverdiyev hələlik azadlıqda olsalar da, hökmü əldə etdikdən sonra verəcəkləri Apellyasiya şikayəti təmin edilməzsə, hökm icra olunacaq və hər iki jurnalist həbs olunacaq.
RATİ və MHİ qeyd edir ki, “Nota” qəzetinin baş redaktor əvəzinə münasibətdə bu hökm son 3 gündə ikincidir. İyunun 20-də Nizami rayon məhkəməsində hakim Vidadi Məmmədov Daxili Qoşunların komandanı Zakir Həsənovun və onun müavininin və Daxili qoşunların bir sıra yüksək rütbəli rəsmisinin ittihamları əsasında Sərdar Əlibəylini Cinayət Məcəlləsinin 147.2-ci maddəsinə (böhtan) əsasən 7 ay müddətinə islah işləri cəzası verib.
RATİ və MHİ defamativ saydığı ifadələrə görə jurnalistləri ağır cəzaya məhkum edən bu məhkəmə qərarlarını qətiyyətlə pisləyir. Nə qədər sərt olmasından asılı olmayaraq tənqidi ifadələrə görə jurnalistlərə belə cəza verilməsi jurnalistlərin gözünü qorxudan, onları ictimai müzakirələrə qatqı verməkdən çəkindirən, demokratik toplumda qeyri-adekvat və ifadə azadlığını kobud pozan addımdır.
RATİ və MHİ jurnalistləri məhkum edən bu məhkəmə qərarlarının dəyişdiriləcəyinə ümid edir.
RATİ və MHİ defamasiyaya görə cinayət cəzasının saxlanmasının belə ağır fəsadlara gətirib çıxardığını bir daha xatırladaraq, hökuməti defamasiyanı Avropa İnsan Haqları Məhkəməsinin müəyyən etdiyi standartlar əsasında tənzimləyən yeni qanunu qəbul edilməsini dəstəkləməyə çağırır.