Reportyorların Azadlıq və Təhlükəsizlik İnstitutu və Media Hüququ İnstitutu 2010-cu ilin dövlət büdcəsi layihəsində Azərbaycan Televiziya və Radio Qapalı Səhmdar Cəmiyyətinə (AzTV) 30 milyon 103 min 665 manat (təxminən 40 milyon dollar) vəsait nəzərdə tutulmasının əleyhinədir.
RATİ və MHİ bəyan edir ki, Azərbaycan vətəndaşlarının ödədiyi vergi hesabına maliyyələşsə də, AzTV ictimai maraqları təmin etmir və yalnız hakimiyyətdə təmsil olunan müəyyən şəxslərin maraqlarına uyğun fəaliyyət göstərir. Xüsusilə dövlət büdcəsindən maliyyələşdiyi halda, Azərbaycan dövləti və vətəndaşları üçün xüsusi əhəmiyyətə malik olan seçkilərdə pulsuz efir vaxtı ayırmamaqla, izləyicilərin lazımi informasiyaları əldə etməsini təmin etmir. İctimai Televiziya (İTV) isə AzTV ilə nisbətdə (hərçənd ki, İTV də üzərinə düşən vəzifələri tam olaraq yerinə yetirmir) seçkilərdə daha çox vaxt ayırdığı, eləcə də fikir müxtəlifliyinə daha çox yer verdiyi halda, bu telekanala AzTV-dən demək olar ki, 4 dəfə az – 8 milyon 25 min 600 manat vəsait ayrılması nəzərdə tutulub.
RATİ-nin apardığı televiziya monitorinqi nəticəsində məlum olmuşdur ki, Azərbaycan telekanalları arasında ən bərbad vəziyyət AZTV-dədir. Belə ki, AzTV balans, siyasi plüralizm, fikir müxtəlifliyi, cəmiyyətin müxtəlif təbəqələrinin maraqlarının qorunması kimi prinsiplərə riayət etməmiş, bir qayda olaraq xəbərlərdə və digər verilişlərdə alternativ fikirlərə yer ayırmamışdır. Bu kanal siyasi xarakterli xəbərlərinin 94%-dən artığını hakimiyyətin müsbət mənada işıqlandırılmasına həsr edib.
RATİ və MHİ Milli Məclisin deputatlarını 2010-cu ilin büdcəsini müzakirə edərkən AzTV-yə ayrılacaq vəsaitə etiraz etməyə və bu layihəyə səs verməməyə çağırır.
RATİ və MHİ xatırladır ki, Azərbaycan 2005-ci ildə Avropa Şurası qarşısında dövlət televiziyasının ləğv edilməsi ilə bağlı öhdəlik götürüb və dövləti bu öhdəliyi yerinə yetirməyə çağırır.
RATİ və MHİ bir daha qanunverici və icraedici hakimiyyətləri AzTV-ni və “İdman-Azərbaycan” telekanalını ləğv etməyə və hər iki kanalın bazasında növbəti İctimai Televiziya kanallarını açmağa çağırır.