Reportyorların Azadlıq və Təhlükəsizlik İnstitutu (RATİ) Daxili İşlər Nazirliyi Mətbuat Xidmətinin rəis müavini Ehsan Zahidovun “Gündəlik Bakı” qəzetinin baş redaktoru Habil Vəliyevi hədələməsini qətiyyətlə pisləyir
Belə ki, “Gündəlik Bakı” qəzetinin 26 oktyabr 2011–ci il tarixində dərc olunmuş sayında Zaqatala RPŞ-də anarxiyanın hökm sürməsi barədə yazı dərc olunub. DİN-nin mətbuat xidmətinin rəis müavini Ehsan Zahidov redaksiya ilə əlaqə saxlayaraq iradlarını bildirib. Sonra qəzetə qəzetə təkzib göndərərək, həmin təkzibin çap olunmasını istəyib. Öz nöbəsində Habil Vəliyev ona zəng edib müəyyən dəqiqləşmələr aparıb. Ehsan Zahidov ”sizin kimi jurnalistin beynini dağıtmaq lazımdır ki, şər-böhtan dolu yazılar yazmaqla ictimaiyyəti çaşdırmayasınız” – deyə baş redaktoru hədələyib.
Bir gün sonra Zahidov mətbuata açıqlamasında bildirib ki, bu ifadəni zor göstərmək mənasında deyil, beynin təmizlənməsi, saflaşması mənasında işlədib.
RATİ DİN rəsmisinin hərəkətini vəzifəli şəxsin mətbuata nümayəndəsinə qarşı ölüm hədəsi kimi qiymətləndirir.
RATİ bəyan edir ki, ölümlə hədələmə Azərbaycan Respublikası Cinayət Məcəlləsinin 134-cü maddəsi (Öldürməklə və ya sağlamlığa ağır zərər vurmaqla hədələmə) ilə cinayət məsuliyyəti yaradır.
RATİ DİN rəhbərliyini və digər səlahiyyətli qurumları jurnalistə hədə-qorxu gəlmiş Ehsan Zahidova qarşı ölçü götürməyə çağırır.