Reportyorların Azadlıq və Təhlükəsizlik İnstitutu (RATİ) Daxili İşlər naziri Ramil Usubovun Hüquq Müdafiəçisi Leyla Yunusa qarşı qaldırdığı iddianı geri götürməsini alqışlayır. İddianın geri götürülməsi 2 mart tarixində keçirilən məhkəmə iclasında elan edilib.
Nazir R. Usubov iddia edirdi ki, Sülh və Demokratiya İnistitunun direktoru Leyla Yunus day.az saytına verdiyi müsahibədə polisin Dəvəçi rayonunda iki bacının yoxa çıxmasında əli olduğunu söyləmiş və bununla onun işgüzar imicinə xələl gətirmişdir. Nazir hüquq müdafiəçisinin təkzib verməsini və 100 min AZN təzminat ödəməsini tələb edirdi.
RATİ inanır ki, iddianı geri götürməklə nazir Ramil Usubov söz azadlığına hörmət nümayiş etdirmiş və digər məmurların da riayət etməli olduğu bir nümunə göstərmişdir. 2007-ci ildə Ramil Usubov yerli və beynəlxalq ictimaiyyət arasında jurnalistlərə və KİV-ə qarşı ən çox iddia irəli sürən bir Azərbaycan məmuru kimi tanınmışdı. Amma onun bu işlə bağlı addımı yeni və müsbət bir ənənənin təzahürüdür. RATİ qeyd edir ki, hökumət məmurları dövlət büdcəsindən istifadə edən ictimai icraçılar kimi demokratik cəmiyyətdə ictimai nəzarətin ayrılmaz hissəsi olan ictimai araşdırmaya və tənqidə məruzdurlar.