Həmçinin “Tolışi-sədo” qəzetinin baş redaktoru Novruzəli Məmmədov və “İdeal” qəzetinin təsisçisi Nazim Quliyev də həbs olunublar. Novruzəli Məmmədov dövlətə xəyanətdə ittiham olunsa da, məhkəmələri qapalı keçirildiyindən onun ədalətli keçməsinə yerli və beynəlxalq ictimaiyyətin böyük şübhələri var. Belə ki, məhkəmə qərarında əks olunan ittiham tərəfinin bir neçə arqumentlərində N.Məmmədovun məhz ifadə azadlığına görə həbs olunduğunu göstərir.
Nazim Quliyev jurnalistlərin peşə etikasını kobud pozduğuna baxmayaraq, RATİ hesab edir ki, böhtan və təhqirə (diffamasiyaya) görə heç kəs həbs olunmamalıdır. N.Quliyev kimi kobud şəkildə və bilərəkdən peşə etikasını pozan media nümayəndələri həbs ilə deyil, yalnız cərimə və ya həbs nəzərdə tutmayan digər qanuni üsullarla cəzalandırmalıdırlar.
Son vaxtlar internet azadlığının məhdudlaşdırılması özünü açıq şəkildə büruzə verir. 2 həftə öncə iki gənc bloqçu – “Alumni Network” Gənclər təşkilatının koordinatoru, AN onlayn televiziyasının rəhbəri Emin Milli (Abdullayev) və OL Gənclər təşkilatının koordinatorlarından biri Adnan Hacızadə də internetə yerləşdirdikləri satirik videoçarxlarına görə, təxribatçılar tərəfindən döyülərək xəsarət almış, zərərçəkmiş qismində polisə şikayət etmələrinə baxmayaraq, təqsirləndirilən şəxs qismində həbs edilmişlər. Bundan əlavə hökumətin yüksək çinli məmurlarının internet mediasının tənzimlənməsi qanunu ilə bağlı məsələni gündəmə gətirməsi narahatedici məqamdır.
Azərbaycanda elektron KİV-in də fəaliyyətinə süni şəkildə ciddi maneələr yaradılır. Bu ilin yanvar ayının 1-dən etibarən Azərbaycanda fəaliyyət göstərən və siyasi plüralizmə xidmət edən üç radiostansiya – “Azadlıq”, “Amerikanın səsi” və BBC radiolarının FM tezliyində yayımına xitam verilmişdir. Yeni televiziya və radio kanallarının açılması üçün şəffaf müsabiqələr keçirilmir və yeni qanun dəyişiklikləri ilə KİV-lərin fəaliyyətləri daha da məhdudlaşdırılır.
18 mart tarixində Azərbaycan Respublikası Konstitusiyasına, 6 mart tarixində “Kütləvi İnformasiya Vasitələri haqqında” Qanuna, 3 aprel tarixində “Televiziya və radio yayımı haqqında” Qanuna, 30 iyun tarixində isə “Qeyri-hökumət təşkilatları (ictimai birliklər və fondlar) haqqında” Qanuna edilmiş əlavələr və dəyişikliklər də KİV-in və vətəndaş cəmiyyətinin fəaliyyətinin məhdudlaşdırılmasına yönəlmişdir. Bundan başqa, internet mediasına nəzarət edilməsi üçün yeni Qanunun qəbul edilməsi istiqamətində iş aparılır ki, bu da internet mediası üzərində senzuranın tətbiqi ilə nəticələnəcək. Bütün bunlar Azərbaycanda plüralizmi yox səviyyəsinə endirir ki, bu da Azərbaycan dövlətinin beynəlxalq təşkilatlar qarşısında götürdüyü öhdəliklərə ziddir.
RATİ Azərbaycan hökumətini
· “Amerikanın Səsi, “Azadlıq” və BBC Radiolarının FM dalğasında yayımını dərhal bərpa etməyə;
· Azərbaycanın müxtəlif bəhanələrlə qeyri-qanuni həbs edilmiş jurnalistləri azad etməyə;
· Fiziki təzyiqə məruz qalmış və şərlənərək həbs olunmuş gənc bloqçular – Emin Milli (Abdullayev) və Adnan Hacızadə azad olunsun və onlara xəsarət yetirmiş şəxslər məsuliyyətə cəlb olunmasını tələb edir.
· Jurnalistlərə qarşı hücumlarda və jurnalistlərin hüquqlarının pozulmasında məsuliyyət daşıyanları qanunun yol verdiyi son həddə qədər məhkəməyə cəlb etməyi;
· Azərbaycanın milli media bazarında xarici yayımçılara qoyulan qadağanı ləğv etməyə;
· Konstitusiyaya və müxtəlif qanunlara mətbuat azadlığını və vətəndaş cəmiyyətinin inkişafını daha da məhdudlaşdıran dəyişiklikləri ləğv etməyi və media ilə bağlı qanunvericiliyi liberallaşdırmağa;
· İnternetlə bağlı heç bir məhdudlaşdırıcı qanun qəbul etməməyə
· KİV nümayəndələrinə qarşı təxribatlara və qondarma cinayət işlərinə son qoyulsun, belə qanunsuzluqlarla məsuliyyətə cəlb olunmuş jurnalistlərin cəzaları ləğv etməyə;
· Böhtan və təhqirə görə cinayət məsuliyyətini ləğv etməyə
C A Ğ I R I R!
RATİ beynəlxalq təşkilatları
* Azərbaycan dövlətinə götürdüyü öhdəlikləri yerinə yetirərək, yuxarıda sadalanan tələbləri yerinə yetirməsi istiqamətində bütün imkanlardan istifadə edərək səylər göstərməyə;
* Tələblər yerinə yetirilmədiyi təqdirdə Azərbaycan dövlətinə ciddi sanksiyalar tətbiq etməyə
C A Ğ I R I R!