Reportyorların Azadlıq və Təhlükəsizlik İnstitutu (RATİ) gənc bloqçular Emin Milli (Abdullayev) və Adnan Hacızadə barəsində Səbail rayon məhkəməsinin 11 noyabr 2009-cu il tarixili hökmündən verilmiş apellyasiya şikayətinin təmin edilməməsini qətiyyətlə pisləyir və hesab edir ki, bu qərar siyasi sifarişlə çıxarılıb.
RATİ xatırladır ki, gənc bloqçular saxta “xuliqanlıq”da ittiham olunaraq həbs edilsələr də, əslində isə internetdə hakimiyyəti tənqid edən materiallar yerləşdirdiklərinə görə şərləniblər. Belə ki, Emin Milli və Adnan Hacızadə 8 iyul tarixində təxribata çəkilməklə döyülərək xəsarət alıblar. Zərərçəkmiş şəxs qismində şikayət etmələrinə və xəsarət almalarına baxmayaraq, Səbail RPİ onlara xəsarət yetirənləri sərbəst buraxmış, və döyülən gənclərin barəsində isə həbs-qətimkan tədbiri seçilərək, barələrində cinayət işi başlanmışdır. Xəsarət almış gənclər polisdə saxlanılarkən onlara zəruri tibbi yardım göstərilməmiş və vəkilləri ilə görüşmələrinə imkan verilməmişdir. Cinayət Məcəlləsinin 221-ci (xuliqanlıq) maddəsi ilə başlanmış cinayət işi ciddi hüquq pozuntuları və qanuna zidd hərəkətlərlə aparılmış və istintaqın gedişatında gənclərə qarşı daha bir saxta ittiham – CM-in 127-ci (qəsdən bədənə az ağır xəsarət yetirmə) maddəsi ilə ittiham irəli sürülmüşdü. 2009-cu il noyabr ayının 11-də Səbail rayon məhkəməsi Emin Millinin 2 il 6 ay, Adnan Hacızadənin isə 2 il azadlıqdan məhrum edilməsi ilə bağlı hökm çıxarmış və Bakı Apellyasiya Məhkəməsi bu gün (10 mart) həmin hökmün qüvvədə saxlanılması barədə qərar çıxarıb. İfadə azadlığına görə şərlənərək həbs olunmuş gənc bloqçuları Vicdan Məhbusu kimi tanıyan yerli və beynəlxalq hüquq-müdafiə təşkilatları onların azad olunması üçün dəfələrlə Azərbaycan hökumətinə müraciətlər etsələr də, gənclərə verilmiş cəza dəyişdirilmədən saxlanmışdır.
RATİ Azərbaycan hakimiyyətini gənc bloqçular Adnan Hacızadə və Emin Millini, həmçinin saxta ittihamlarla həbs olunmuş digər jurnalistlər – “Gündəlik Azərbaycan” və “Realnıy Azerbaydjan” qəzetlərinin baş redaktoru Eynulla Fətullayev və “Azadlıq” qəzetinin baş redaktoru Qənimət Zahidə verilmiş cəzaları ləğv etməyə, onları dərhal azadlığa buraxmağa çağırır.
RATİ həmçinin Azərbaycan hakimiyyətini ölkədə söz azadlığını təmin etməyə və müstəqil mətbuat üçün münbit şərait yaratmağa çağırır.