Reportyorların Azadlıq və Təhlükəsizlik İnstitutu (RATİ) həbsdə olan “Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru Eynulla Fətullayevin ailəsinin ölümlə təhdid olunmasını pisləyir.
Belə ki, dünən (17 mart) saat 12.30 radələrində ev telefonuna zəng edən naməlum şəxs baş redaktorun atasına “oğlun da, sən də çox danışmayın, yoxsa pis olar, hamınızı təhlükə gözləyir, sizi məhv edəcəyik” deyərək, ölümlə təhdid edib. Emin Fətullayev bu barədə polisə müraciət edib. Qeyd edək ki, Eynulla Fətullayev ötən həftə mərhum jurnalist Elmar Hüseynovun qətlinin MTN-in yüksək rütbəli zabiti tərəfindən təşkil olunması ilə bağlı açıqlamalarla çıxış edib.
RATİ bəyan edir ki, ölümlə hədələmə Azərbaycan Respublikası Cinayət Məcəlləsinin 134-cü maddəsi (Öldürməklə və ya sağlamlığa ağır zərər vurmaqla hədələmə) ilə cinayət məsuliyyəti yaradır.
RATİ Azərbaycan hüquq-mühafizə orqanlarını baş redaktorun ailəsini hədələyənləri taparaq, qanunvericilikdə nəzərdə tutulmuş qaydada cəzalandırmağa çağırır.