Reportyorların Azadlıq və Təhlükəsizlik İnstitutu (RATİ) Azərbaycan polislərinin RATİ-nin iki əməkdaşının oğurlanması məqsədilə cinayətkar hərəkətlərini qınayır və bunu hüquq müdafiə və jurnalist təşkilatına basqı kimi qiymətləndirir.
Belə ki, 2011-ci il martın 7-də RATİ-nin iki əməkdaşı Mehman Hüseynov (fotoqraf və videooperator) və Əbülfət Namazov (fotoqraf, sürücü) təşkilatın xidməti avtomobilində şəhər mərkəzində hərəkət edərkən 3 avtomobil (qara Mitshubishi Pajero və 2 VAZ 2107, boz və qırmızı rəngli) tərəfindən izləndiklərini görüblər. İşıqforda dayanan zaman özlərini təqdim etməyən mülki geyimli şəxslər RATİ-nin avtomobilinə yaxınlaşaraq onu əhatəyə alıblar, sonra isə qapıları açaraq RATİ əməkdaşlarının qollarını burmuş və zorla müxtəlif maşınlara oturdaraq naməlum istiqamətdə hərəkət etmişlər. Özlərini təqdim etmədən, həmçinin hərəkətlərinin səbəblərini izah etmədən RATİ əməkdaşlarını Nərimanov Rayon Polis İdarəsinin cinayət-axtarış şöbəsinə gətiriblər, rəisin kabinetinə aparıblar və sorğu-sual ediblər. Konkret olaraq Mehman Hüseynovu facebook saytındakı yazıları və youtube-da yerləşdirdiyi videoroliklərlə bağlı sorğu-sual ediblər. Onun gənclər tərəfindən keçirilməsi planlaşdırılan etiraz aksiyalarında iştirak üçün gənclərə internetdə çağırışın təşkil edilməsinə aidiyyatının olub-olmadığını da aydınlaşdırmağa çalışıblar. Əbülfət Namazovdan RATİ-nin əməkdaşlarının sayı, onların əmək haqları, RATİ sədri Emin Hüseynovun yaşayış yeri, ofisdən evə getmə marşrutu və hərəkət vaxtını və s. soruşublar. Polislərin söhbətlərindən RATİ əməkdaşları başa düşüblər ki, RATİ-nin bir sıra əməkdaşları, xüsusilə də RATİ sədri və onun ailə üzvləri daim izlənilirlər. Bunu o təsdiq edir ki, RATİ tərəfindən verilən suallara polislər düzgün cavab verirdilər. Polislərin suallarına düzgün cavab verməyəndə polislər RATİ əməkdaşlarına bildirirdilər ki, onlar düz demirlər və öz suallarına doğru olan cavabı verirdilər. Hüseynovu internetdə fəaliyyəti ilə bağlı izahat yazmağa vadar ediblər. Namazov isə şifahi şəkildə dindirilib. M. Hüseynov və Ə. Namazovu 2 saatdan artıq idarədə saxladıqdan sonra onları sərbəst buraxıblar. Polis həmçinin təşkilatın xidməti avtomobilini də geri qaytarıb. RATi-nin sürücüsü maşına baxış keçirib və aşkarlayıb ki, maşının salonunda axtarış həyata keçirilib. Saxlanmaları barəsində heç bir rəsmi sənəd ala bilməyən Namazov və Hüseynov RATİ-nin ofisinə qayıdıblar. Qeyd edilməlidir ki, həbsdən 2 saat qabaq polislər RATi-nin ofisinə gəliblər və gənc fəalların həbsi ilə bağlı vətəndaş cəmiyyəti nümayəndələrinin təşkil etdiyi tədbirdə kimlərin iştirak etmələri ilə maraqlanıblar. martın 7-də axşam saatlarında RATİ-nin daha bir neçə əməkdaşı izlənilib.
RATİ polisin hüquqazidd hərəkətlərini həm təşkilatın əməkdaşlarına, həm də bütövlükdə təşkilatın özünə təzyiq kimi qiymətləndirir.
RATİ hesab edir ki, Azərbaycanda hüquq müdafiəçilərinə və jurnalistlərə münasibətdə repressiv vəziyyət onların təhlükəsizliyi üçün real təhlükədir.
RATİ beynəlxalq ictimaiyyətə, xüsusilə BMT, ATƏT və Avropa Şurasına müraciət edir ki, onlar Azərbaycan hakimiyyətinə təzyiq göstərsinlər və ondan hüquq müdafiəçilərinə və jurnalistlərə münasibətdə aqressiyaya son qoymağı tələb etsinlər.
RATİ həmçinin Azərbaycana akkreditə olunmuş demokratik ölkələrin diplomatik missiyaların rəhbərlərinə müraciət edir ki, onlar təcili surətdə öz aralarında geniş məsləhətləşmələr aparsınlar və Azərbaycanda başqa cür düşünmənin boğulmasına yönələn hakimiyyətin siyasi repressiyalarını birgə qınasınlar.
RATİ Azərbaycanın siyasi hakimiyyətinə müraciət edərək, başqa cür düşünənlərə münasibətdə güc strukturlarının qanunazidd hərəkətlərinə son qoymağa çağırır. RATİ həmçinin vicdan məhbusu Eynulla Fətullayevi, habelə internetdə göstərdikləri fəallığa görə həbs edilən gənc fəallar Cabbar Savalanlını, Bəxtiyar Hacıyevi, Dəyanət Babayevi, Səxavət Soltanlını və Rəşadət Axundovu dərhal azad etməyə çağırır.
