CABBAR SAVALANIN İŞİ ÜZRƏ NARKOLOJİ EKSPERTİZA ZİDDİYYƏTLİ RƏY VERİB

mart 10th, 2011
Martın 9-da vəkilləri Anar Qasımov və Əsabali Mustafayev qanunsuz narkotik saxlamaq ittihamı ilə həbs olunmuş AXCP Gənclər Komitəsinin üzvü  Cabbar Savalanlı ilə görüşüblər.

  Anar Qasımovun verdiyi məlumata görə, Səhiyyə Nazirliyi Respublika Narkoloji Dispanserinin həkimləri ekspertiza keçiriblər və Cabbar Savalanlının narkotikdən nə fiziki, nə də psixoloji asılılığı olmadığını və məcburi müalicəyə ehtiyacı olmadığını müəyyən ediblər. Bununla belə, sənəddə gəncin narkotikdən istifadə etməsi istisna edilmir.

            Vəkil  bu rəyi ziddiyyətli hesab edir və Cabbar Savalanın əleyhinə istifadə oluna biləcəyini ehtimal edir.

            Müdafiə tərəfin alternativ ekspertiza keçirilməsi barədə vəsatəti təmin edilməyib və onlar bu qərardan şikayət vermək niyyətindədirlər.

            Qasımov həmçinin təkrar ekspertiza keçirilməsi, Narkoloji Dispanserin rəyi verən həkimlərinin istintaqda şahid kimi dindirilməsi, alternativ ekspertiza üçün Cabbar Savalandan vəkillərinin iştirakı ilə qan nümunəsi götürülməsi barədə yeni vəsatət qaldırıb.

Müdafiə tərəfi həmçinin Savalanın işi üzrə müstəntiqin dəyişdirilməsini istəyir.

     Xatırladaq ki,  Cabbar Savalan fevralın 5-də qanunsuz narkotik saxlamaq ittihamı ilə həbs edilib. Lakin onun sosial şəbəkələrdə iqtidar əleyhinə səsləndirdiyi fikirlərə görə həbs olunmağı istisna edilmir.