Hakimiyyəti kəskin tənqid edən “Monitor” jurnalının baş redaktoru Elmar Hüseynovun qətlindən 6 ildən artıq müddət keçsə də, bu günə kimi bu qətlin icraçıları və sifarişçiləri cinayət məsuliyyətinə cəlb olunmayıblar.
Jurnalistlərə qarşı fiziki basqılar 2011-ci ildə də davam etmişdir, “Azadlıq” qəzetinin əməkdaşları Seymur Həziyev və Ramin Dekonun bir neçə ay bundan əvvəl oğurlanaraq döyülməsini qeyd etmək kifayət edir.
RATİ həmçinin bəyan edir ki, 2009 ilin əvvəlindən hakimiyyət Azadlıq Radiosu, BBC, Amerikanın Səsi radiostansiyalarının milli FM tezlikdə yayımını dayandırılıb və faktiki olaraq Azərbaycan əhalisini elektron informasiya vasitələrindən düzgün informasiya əldə etmək hüququndan mərhum edib.
Hakimiyyətin söz azadlığına qarşı mürtəce siyasəti nəticəsində bu gün ölkədə müstəqil medianın inkişafı üçün heç bir zəruri şərait yoxdur. Radiotezliklərin paylanması hakimiyyətin sərt nəzarəti altında həyata keçirilir ki, bu da əsl müstəqil teleradio kanallarının formalaşmasına mane olur. Mövcud televiziya və radioların monitorinqi isə bu medianın tamamilə hakimiyyətə xidmət etdiyini göstərir.
Son dövrlər də azad söz üçün yeganə məkan İnternet olduğundan hakimiyyət bu istiqamətdə də mürtəce addımlar atmağa başlamışdır. Belə ki, 2009-cu ildə həbs edilən daha sonra azad edilən bloggerlər Emin Milli və Adnan Hacızadə barəsində çıxarılmış hökm qüvvədədir və onlar ölkəni tərk edə bilmirlər. Facebook sosial şəbəkəsində aktivliyi ilə seçilən gənc fəallar Cabbar Savalanlı və Bəxtiyar Hacıyev müxtəlif saxta ittihamlarla həbsə atılıblar və onların cəzalandırılması ilə bağlı məhkəmə qərarlarının veriləcəyi gözlənilir.
RATİ Azərbaycan hökumətinə üz tutaraq söz azadlığını boğmağa yönələn addımlara son qoymağı, həbsdə olan vicdan məhbusu, jurnalist Eynulla Fətullayevi dərhal azad etməyi, Elmar Hüseynovun qatillərini və sifarişçilərini cinayət məsuliyyətinə cəlb etməyi, yeni televiziya və radioların açılması üçün mütəmadi və şəffaf tenderlər keçirməyi, xarici radioların yeli tezliklərdə yayımına icazə verməyi tələb edir. RATİ eyni zamanda Azərbaycanın üzv olduğu beynəlxalq qurumlara müraciət edərək onları Azərbaycanda söz azadlığına və insan haqlarına dəstəklərini və diqqətlərini artırmağa, eləcə də Azərbaycan hakimiyyətindən üzərinə götürdüyü beynəlxalq öhdəliklərə riayət etməyi tələb etməyə çağırır.