Bu gün (03 May) Sumqayıt şəhər məhkəməsində hakim İlqar Məmmədovun sədrliyi ilə AXCP Gənclər təşkilatının üzvü Cabbar Savalanlının barəsində Cinayət Məcəlləsinin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə açılan cinayət işi üzrə məhkəmə prosesi keçirilib.
Daha sonra müstəntiq Ziyad Əliyev ifadə verib. Savalanlının vəkilləri hüquqlarını müdafiə etdikləri şəxsin həbs edilən vaxt ifadə verərkən, onun dostları ilə hansı məkanlarda olmasını bildirməsinə baxmayaraq, istintaq zamanı bunların müəyyənləşdirilmədiyini müstəntiqə bildiriblər.
Hər iki vəkil hal şahidlərinin həmin günü gənc fəaldan başqa digərlərinə də hal şahidliyi etməsini sübut edən faktlara malik olduqlarını bildirdilər və belə olduğu halda istintaq hərəkətinin etibarsız hesab edilməsi, həmçinin hüquq müdafiəçiləri Səidə Qocamanlı, Novella Cəfəroğlu, Səadət Bənanyarlı, eləcə də vəkillər İntiqam Əliyev və Ənnağı Hacıbəylinin, o cümlədən Müsavat Partiyasının başqanı İsa Qəmbərin gənc fəalı zaminə götürmək istəməsi barədə vəsatət qaldırsalar da, məhkəmə bu vəsatətləri təmin etmədiyini bildirdi.
Daha sonra çıxış edən dövlət ittihamçısı Mövlud Osmanov çıxış edərək, gənc fəal Cabbar Savalanlının 3 il müddətinə azadlıqdan məhrum edilməsi və cəzasının tutulduğu müddətdən hesablanmasını məhkəmədən xahiş etdi.
Hakim İlqar Məmmədov məhkəmə prosesini 4 may saat 12:00-a təyin etdi.
Xatırladaq ki, Cabbar Savalanlı fevralın 5-də qanunsuz narkotik saxlamaq ittihamı ilə həbs edilib. Cabbar Savalanlıya Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi açılıb. Lakin onun sosial şəbəkələrdə iqtidar əleyhinə səsləndirdiyi fikirlərə görə həbs olunmağı istisna edilmir.