REPORTYORLARIN AZADLIQ VƏ TƏHLÜKƏSİZLİK İNSTİTUTUNUN BƏYANATI

may 4th, 2011
         Reportyorların Azadlıq və Təhlükəsizlik İnstitutu (RATİ) Sumqayıt Şəhər Məhkəməsi qarşısında jurnalistlərə qarşı kobud rəftarı qınayır və bunu jurnalistlərin peşə fəaliyyətinə müdaxilə kimi qiymətləndirir.

  Belə ki, gənc fəal Cabbar Savalanlıya 2 il 6 ay həbs cəzasının verildiyi məhkəmədən sonra polislə çıxarılmış qərara etiraz edən gənclər arasında insident baş verib, jurnalistlər bu və məhkəmədən sonra baş verən digər hadisələri işıqlandırmaq istəyərkən mülki geyimli şəxslərin sərt müdaxiləsinə məruz qalıblar. “Azadlıq” radiosunun əməkdaşı Esmira Cavadova, “Turan” informasiya Agentliyinin əməkdaşı Pərvanə Bayramova və “Reportyorların Azadlıq və Təhlükəsizlik İnstitutu”-nun əməkdaşları – Əbülfət Namazov və Fərqanə Novruzova mülki geyimli şəxslərin fiziki təzyiqinə məruz qalıblar, onların çəkiliş aparmalarına maneəçilik törədilib, ərazidən kobudluqla uzaqlaşdırılıblar. Həmin şəxslər “Azadlıq” radiosunun əməkdaşı Esmira Cavadovanın kamerasını əlindən alıblar və orada olan bütün çəkilişləri  siliblər. Eyni zamanda mülki geyimli şəxslər tərəfindən Namazovun və Novruzovanın da müvafiq olaraq videokamerasını və fotoaparatını əllərindən almağa cəhd edilib.

    RATİ bu hadisənin Azərbaycanda söz azadlığının real durumunu bir daha göstərdiyini və bu kimi halların davam edəcəyi təqdirdə Azərbaycanın adının söz azadlığı olmayan ölkələr sırasında qalacağını bəyan edir. Jurnalistlərin fəaliyyətinə mane olmaqla hakimiyyət nümayəndələri Azərbaycanın beynəlxalq təşkilatlar qarşısında götürdüyü öhdəliklərə biganə yanaşır və ölkənin onsuz da yüksək olmayan imicini daha da ləkələyirlər.

  RATİ hesab edir ki, jurnalistlərin peşə fəaliyyətinə mane olma həm Azərbaycan Respublikasının qanunvericiliyi ilə, həm də beynəlxalq-hüquqi sənədlərlə qadağandır. Bu müdaxilə birbaşa olaraq jurnalistlərin məlumat almaq, toplamaq və yaymaq hüququnun pozulmasıdır.

 RATİ Azərbaycan hakimiyyətindən jurnalistlərin fəaliyyətinə kobud surətdə mane olan şəxslərin dərhal cəzalandırılmasını və bu kimi hallara yol verilməməsi üçün tədbirlərin görülməsini  tələb edir. RATİ eyni zamanda beynəlxalq ictimaiyyəti bu məsələyə biganə yanaşmayaraq Azərbaycan hakimiyyətindən söz azadlığı sahəsində üzərinə götürdüyü öhdəliklərə əməl etməyi tələb etməyə çağırır.