Habelə Fətullayevə qarşı 2009-cu ilin dekabrın 29-da saxlanıldığı 12 saylı Cəzaçəkmə Müəssisəsində saxta narkotik ittihamı ilə cinayət işi başlanmışdı və 06 iyul 2010-cu il tarixində Eynulla Fətullayev Cinayət Məcəlləsinin 234.1-ci maddəsi ilə (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) təqsirli bilinərək, 2 il 6 ay müddətinə azadlıqdan məhrum etmişdi. Bu qərardan verilən apellyasiya şikayəti də təmin edilməmişdi. Hal-hazırda Ali Məhkəməyə kassasiya şikayəti verilib.
RATİ ümid edir ki, Ali Məhkəmə Fətullayev barəsində işə xitam verəcək və Avropa məhkəməsinin Eynulla Fətullayevə ödənilməsi müəyyən edildiyi kompensasiya hökumət tərəfindən Fətullayevə ödəniləcək.
RATİ bəyan edir ki, Eynulla Fətullayevin azad edilməsi Azərbaycanda söz azadlığının real durumuna müsbət təsir edəcək bir haldır, lakin yenə də siyasi məhbusların sayının çox olması Azərbaycanın adının söz azadlığı olmayan ölkələr sırasında qalmasına səbəb olacaq.
RATİ hesab edir ki, Azərbaycan hökuməti saxta ittihamlarla həbs olunmuş və Amnesty İnternational tərəfindən vicdan məhbusu kimi tanınan gənc fəallar Cabbar Savalanlını, Bəxtiyar Hacıyevı və 2 aprel mitinqi zamanı həbs edilən Arif Hacılı, Tural Abbaslı, Əhəd Məmmədli, Elşən Həsənov, AXCP üzvləri Məhəmməd Məcidli, Sahib Kərimov, Babək Həsənov və vətəndaş Ülvi Quliyevi azad etməli, eyni zamanda Facebook sosial şəbəkəsindəki yazılarına görə barəsində cinayət işi açılmış Elnur Məcidlinin axtarışını dayandırmalıdır.