Reportyorların Azadlıq və Təhlükəsizlik İnstitutu (RATİ) “Azadlıq” radiosunun Azərbaycan xidmətinin müxbiri Yafəz Həsənovun (Əkrəmoğlu) Naxçıvandan qovulmağını qətiyyətlə pisləyir, bu hadisəni jurnalistin sərbəst hərəkət və sərbəst informasiya toplamaq hüququnun kobud şəkildə pozulmağı kimi qiymətləndirir.
“Avqustun 31-də üç nəfər mülki geyimli şəxs məni küçədə saxladı. Onlar maşında idilər və mənim də maşına əyləşməyimi tələb etdilər. Kim olduqlarını soruşduqda mənə cavab vermədilər və zorla maşına oturtdular. Onların xüsusi xidmət orqanı işçiləri olduğunu anladım. Onlar pasportumu əlimdən aldılar və mobil telefonu söndürməyi tələb etdilər”, – deyə qeyd edən müxbirin sözlərinə görə, xüsusi xidmət əməkdaşları ondan “satqın” olan Turac Zeynalovun ölümü haqqında reportaj hazırlamamağı tələb ediblər. Müxbiri Azərbaycan-İran sərhədindəki nəzarət-buraxılış məntəqəsinə aparıblar, oradan keçiriblər və Bakıya getməyi əmr ediblər. Onu Naxçıvana qayıdacağı təqdirdə cəzasını çəkəcəyi ilə hədələyiblər. Sentyabrın 1-də müxbir İran ərazisindən maşınla Bakıya gəlib.
RATİ qeyd edir ki, bu kimi hallar Naxçıvan Muxtar Respublikası və ümumilikdə Azərbaycan Respublikasının onsuz da yüksək olmayan beynəlxalq nüfuzuna ciddi zərbə vurur. RATİ Azərbaycan hökumətini bu kimi halların qarşısının alınması üçün tədbirlər görməyə, jurnalistlərin qanuni peşə fəaliyyəti üçün imkan yaratmağa çağırır.