Bu gün (5 sentyabr) “Turan” İnformasiya Agentliyinin Naxçıvan üzrə bölgə müxbiri, habelə Naxçıvan Demokratiyaya Dəstək və İnsan Hüquqları Resurs Mərkəzinin rəhbəri Məlahət Nəsibova ölümlə hədələnib.
“Məlahət evdən çıxanda binanın qarşısında Rəfael Əsədov adlı MTN işçisinin anası Şölə xanımın təhdid və təhqirlərinə məruz qalıb. Qadın onu təhqir edərək, nalayiq söyüşlər söyüb. Sonra da o Məlahətə deyib ki, oğlunun adını hər yerdə hallandımasin, yoxsa başına oyun açacaqlar, onu öldürərlər”, – deyə qeyd edən İ.Nəsibovun sözlərinə görə, sentyabrın 2-də RATİ-nin mətbuat mərkəzində Naxçıvan MTN-də avqustun 31-də baş vermiş ölüm hadisəsi ilə bağlı mətbuat keçirdikləri gün Naxçıvandakı evlərinə tanımadıqları bir şəxs gələrək, M.Nəsibovanı soruşub, sonra da evdə olan 16 yaşlı qızlarını hədələyərək, çıxıb gedib.
İlqar Nəsibovun sözlərinə görə, baş verən hadisə ilə bağlı bu gün jurnalist Elman Abbasov, onun özü və M. Nəsibova Naxçıvan Şəhər Polis İdarəsində olaraq, şikayət ərizəsi yazıblar: “Bizi qəbul edən Sahib Əliyev adlı polis zabiti şikayətin obyektiv araşdırılacağını və nəticə barədə bizləri məlumatlandıracaqlarını bildirdi” .