RATİ qeyd edir ki, artıq Azərbaycanda jurnalistlərin təzyiqlərlə üzləşməsi adi hal almağa başlayıb. Belə ki, son üç-dörd ay ərzində bəzi jurnalistlər oğurlanaraq döyülür, bəziləri məhkəmə qarşısında, mitinqlərdə çəkiliş aparan zaman fiziki təzyiqə məruz qalırlar və ya saxta ittihamlarla (narkotik maddə saxlanma, xuliqanlıq və s ittihamlarla )həbs edilirlər.
RATİ hesab edir ki, Avropa Şurası qarşısında öhdəlik götürən Azərbaycan Respublikasında insanların təməl hüquqlarından olan ifadə azadlığı hüququ məhdudlaşdırılırsa, jurnalistlərin fəaliyyətinə mane törədilirsə bu ölkədə demokratiyanın olması beynəlxalq təşkilatlarda şübhə doğurur.
RATİ bəyan edir ki, demokratik ölkə olduğunu bəyan edən Azərbaycanda jurnalistlərə qarşı fiziki təzyiq edilməsi, onların kameralarının əllərindən alınması Azərbaycan Respublikasının Konstitusiyasının 47-ci (fikir və söz azadlığı ) Cinayət Məcəlləsinin 163-cü (Jurnalistlərin qanuni peşə fəaliyyətinə mane olma)və İnsan Hüquq və Əsas Azadlıqlarının Müdafiəsi haqqında Avropa Konvensiyasının 10-cu (İfadə Azadlığı) maddələrinin pozuntusudur.
RATİ Azərbaycan hakimiyyətini jurnalistlərə qarşı edilən təzyiqlərə son qoymağa və jurnalistlərə təzyiq edən şəxslərə qarşı cəzalandırmağa çağırır.