YAZIÇI-PUBLİSİST RAFİQ TAĞININ QƏTLİ İLƏ BAĞLI REPORTYORLARIN AZADLIQ VƏ TƏHLÜKƏSİZLİK İNSTİTUTUNUN

            Reportyorların Azadlıq və Təhlükəsizlik İnstitutu 23 noyabr Beynəlxalq Cəzasızlıqla Mübarizə Günündə jurnalist-yazıçı Rafiq Tağının ölümünə gətirib çıxardan qətli Azərbaycan hökumətinin jurnalistlərə və söz azadlığına olan etinasızlığını qınayır.

Belə ki, Rafiq Tağı noyabrın 19-u axşam saatlarında işdən çıxıb evə gedərkən, evinin yaxınlığında naməlum şəxs tərəfindən bıçaqlanıb. R. Tağı həyat üçün çox təhlükəli 6 bıçaq yarası alsa da, həkimlərin  onun üzərində keçirdiyi 7 saatlıq cərrahiyə əməliyyatı nəticəsində onun həyatını xilas etmək  mümkün olub. Noyabrın 21-də Rafiq Tağı reanimasiya şöbəsindən çıxarılaraq palataya köçürülüb. Sui -qəsdə məruz qalan jurnalist xəstəxanada sanki başlı-başına qalmışdır. Belə ki, reanimasiyadan çıxarılandan sonra Rafiq Tağı faktiki olaraq daim həkim nəzarətindən  kənarda qalıb.  Onu xüsusi mühafizə  ilə də təmin etmədilər. Yalnız noyabrın 23-ü səhər saatlarından Daxili İşlər Nazirliyi onun mühafizəsi üçün bir neçə polis ayırmışdı. Həmin gün saat 15:35 radələrində Rafiq Tağının vəziyəti qəflətən pisləşdi və bir neçə dəqiqədən sonra o müəmmalı şəkildə dünyasını dəyişdi. Məhkəmə tibbi ekspertizasının rəsmi nəticələrinə görə jurnalist aldığı bıçaq yaralarının kəskinləşməsindən ölüb. Maraqlısı odur ki, noyabrın 21 və 22-si Rafiq Tağının vəziyyəti o qədər yaxşılaşmışdı ki, hətta o bir neçə kütləvi informasiya vasitəsinə də müsahibələr verə bilmişdi və  yanına gəlib gedənlərlə danışırdı.

 

            RATİ hesab edir ki, sui-qəsddən sağ çıxan jurnalistin həyatını zəruri müalicə ilə təmin etmiş olsaydılar,  onu xilas etmək olardı. Lakin bütün bu günlər hökumət R. Tağıya sanki biganəsizlik nümayiş etdirdi.

 

            RATİ əmindir ki,  R.Tağını  məhz jurnalist olduğu üçün faktiki olaraq qətlə yetirdilər.

            23 noyabr Beynəlxalq Cəzasızlıqla Mübarizə Günündə bütün dünyada jurnalistlər öz həmkərlarını qətlə yetirən  qüvvələrə öz etirazlarını nümayiş etdirmək üçün bir yerə toplaşaraq müxtəlif etiraz aksiyalarını keçirirlər. Azərbaycanda da məhz bu gündə  jurnalistin həlak olması bir daha göstərdi ki, ölkədə ifadə azadlığının durumu növbəti təhlükəli pilləyə qalxdı. Qətlin üzərindən 6 ildən çox müddətin keçməsinə baxmayaraq bu günə qədər “Monitor” Jurnalının baş redaktoru Elmar Hüseynovun qətlinin sifarişçiləri və icraçıları tapılmayıblar .

            Bütün  bu jurnalist qətillərinin üstünün açılmasında siyasi məsuliyət  Azərbaycan hökumətinin üzərindədir.

            Məhz buna görə də RATİ Azərbaycan hökumətindən jurnalistlərin qətillərini sifariş edən və icra edən şəxsləri tapıb ədalət mühakiməsinə çıxarmağa çağırır.

            RATİ  beynəlxalq ictimaiyyəti Azərbaycanda  ifadə azadlığını xüsusi diqqətdə saxlamağa və Azərbaycan  jurnalistləri ilə  həmrəy olmağa çağırır.