“Sərhədsiz reportyorlar” Savalanın məhkəmə prosesini işıqlandıran bir neçə jurnalistin saxlanması və döyülməsi faktını da qeydə alıb. Təşkilat blogger Cabbar Savalanın dərhal və şərtsiz azad edilməsini, sosial şəbəkələrdə fəallara qarşı repressiyalara son qoyulmasını tələb edib.
Digər nüfuzlu beynəlxalq təşkilat – Amnesty İnternational Savalanın barəsindəki hökmü pisləyərək onu saxta adlandırıb. “Müxalifətin küçə aksiyalarında iştirakından və Facebook sosial şəbəkəsi vasitəsilə gəncləri etiraz aksiyalarında iştiraka çağırmasından sonra gənc fəalın izlənilməsinə başlanılıb,”-deyə bənayatda qeyd edilib.
“Savalan küçədə həbs olunduğu zaman onun üzərindən heç nə tapılmayıb. Lakin sonra polisdə onun cibindən narkotik maddə çıxıb. Bütün bunlar təsdiqləyir ki, ittihamlar saxtadır, həbsin əsl səbəbi onun etiraz aksiyalarına çağırışlar etməsidir, -deyə «Amnesty International»ın Avropa və Mərkəzi Asiya proqramının direktor müavini John Dalhuisen bildirib.
Human Rights Watch təşkilatı da Savalanın həbsini pisləyən bəyanatla çıxış edib və bu hadisəni tənqidi səslərin boğulması adlandırıb. “Bu cür vəhşi repressiyaların Avropa Şurasının üzvü olan ölkədə baş verməsi utandırıcı haldır”, – deyə təşkilatın Avropa ölkələri üzrə nümayəndəsi Reyçel Denber vurğulayıb. O əlavə edib ki, etiraz aksiyalarında fəal iştirak etmiş və son parlament seçkilərində hakimiyyətin saxtakarlığını ifşa etmiş Vidadi İsgəndərov da yaxın vaxtlarda növbəti siyasi məhbus ola bilər.
Bununla yanaşı ABŞ səfirliyi də Cabbar Savalanlının həbsinə münasibət bildirib. “Azadlıq” radiosunun məlumatına görə Səfirliyin açıqlamasında deyilir ki, cənab Savalanlının «Facebook» şəbəkəsində etirazlara səsləyən şərhlər yerləşdirməsindən az sonra həbsi bəzi müşahidəçilərdə ona qarşı ittihamların həqiqiliyi və bu halda ədliyyə sisteminin müstəqilliyi ilə bağlı suallar doğurur. Amerika Birləşmiş Ştatları Azərbaycanda demokratik qurumların və hüquq normalarının güclənməsini əzmlə dəstəkləyir. Ədliyyə orqanlarına müraciət edilir ki, Savalanlının apelyasiyasına Azərbaycanın hüquq və beynəlxalq öhdəliklərinə uyğun şəkildə baxılsın.
Xatırladaq ki, Cabbar Savalanlı fevralın 5-də qanunsuz narkotik saxlamaq ittihamı ilə həbs edilib. Cabbar Savalanlıya Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi açılıb. Mayın 4-də Sumqayıt Şəhər Məhkəməsi Cabbar Savalanlının 2 il 6 ay müddətinə azadlıqdan məhrum edilməsi barədə hökm çıxarıb. Lakin onun sosial şəbəkələrdə iqtidar əleyhinə səsləndirdiyi fikirlərə görə həbs olunmağı istisna edilmir.