“Ayna”-“Zerkalo” qəzetlərinin, habelə Reportyorların Azadlıq və Təhlükəsizlik İnstitutunun əməkdaşı İdrak Abbasov özünün və ailə üzvlərinin üzləşdiyi təzyiqlərlə bağlı daxili işlər naziri Ramil Usubovun şəxsi nəzarəti altında təhqiqat gedir.
Qeyd edək ki, İ.Abbasov ötən həftənin sonunda DİN Baş İdarəsinin rəis müavini Orxan Kərimov tərəfindən qəbul edilib və o, jurnalistə işin şəxsən nazir R.Usubovun nəzarəti altında olduğunu bildirib.
Habelə İ.Abbasov bu gün Mətbuat Şurasının sədri Əflatun Amaşov tərəfindən qəbul edilib. Şura sədri jurnalistdə bildirib ki, özünün və ailəsinin üzləşdiyi problemlərlə bağlı DİN-ə müraciət edilib. Ə.Amaşov qeyd edib ki, məsələ Şuranın nəzarətindən kənar qalmayacaq və məsələ ilə bağlı yaxın günlərdə bir qrup redaktor, habelə İ.Abbasovun iştirakı ilə daxili işlər naziri ilə görüş təşkil etməyə çalışacaq.
Xatırladaq ki, sentyabrın 9-da saat 10 radələrində “Binəqədi OİL”un 30-50 nəfərlik “xüsusi təyinatlı”sı ağır texnika ilə Binəqədi rayon Xocasən qəsəbəsi Yuxarı Sulutəpə yaşayış massivi Ruslan Allahverdiyev küçəsində daş hasarla hörülmüş və dəmir darvazası olan həyətdə daxil olaraq İ.Abbasovun qohumlarımı vəhşiliklə döyüblər. Basqınçılar həyətə ekskavatorla darvazanı sındırmaqla daxil olublar. Daha sonra qara və mavi geyimli idmançı cüssəli şəxslər ağır ifadələrlə təhqir etməklə bərabər qohumlarını ayaq və əl zərbələri, habelə rezin dəyənəklərlə döyüblər. Habelə İ.Abbasovun qardaşı Ədalət Abbasova məxsus evin bir qismi ekskavatorla uçurulub.
Baş verən hadisə ilə bağlı İ.Abbasovun atası Telman Abbasov 4 saylı şəhər xəstəxanasının reanimasiya şöbəsinə, qardaşı Ədalət Abbasov və anası Naimə Quliyeva 1 saylı Kliniki Mərkəzə (Semaşko) çatdırılıblar. Hazirda onlar ev şəraitində müalicələrini davam etdirirlər. Onu da qeyd edək ki, İ.Abbasovun özü barədə polisə xuliqanlıqla bağlı, qardaşları Vaqif Abbasov və Raman Abbasov barədə isə “adam döymə” ilə bağlı şikayətlər verilib. Ailənin hüquqlarının qorunması ilə Media Hüququ İnstitutunun əməkdaşı, vəkil Elçin Sadıqov məşğul olur.