“Tolışı sədo” qəzetinin həbsdə olan baş redaktoru Hilal Məmmədov “İsaxan Aşurov” mükafatının ilk laureatı seçilib. Sülh və Demokratiya İnstitutu tərəfindən təsis edilmiş bu mükafat insan hüquqları vəkili İsaxan Aşurovun xatirəsinə həsr olunub və hər il insan hüquqları sahəsində xüsusi xidmət göstərmiş şəxslərə təqdim olunacaq. İnsan hüquqlarını müdafiə fəaliyyətinə görə həbs olunmuş Hilal Məmmədov “El” hərəkatının qərargahında bir çox tanınmış şəxslərin iştirak etdiyi təqdimat mərasimində qalib elan olunub. Mükafat jurnalistin adından onun vəkili Ramiz Məmmədova təqdim edilib.
00Xatırladaq ki, Hilal Məmmədov Cinayət Məcəlləsinin 234.4.3-cü (Qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama), 274-cü (dövlətə xəyanət) və 283-cü (milli, irqi, sosial və ya dini nifrət və düşmənçiliyin salınması) maddələri ilə ittiham edilir.