Bu gün (8 iyun) Nizami rayon Məhkəməsində hakim Cahangir Yusifovun sədrliyi ilə akademik Cəlal Əliyevin “Yeni Müsavat” qəzetinə, qəzetin baş redaktor müavini Azər Ayxana və məqalə müəllifi Qoşqar Bakılıya qarşı mülki qaydada iddiasına əsasən məhkəmə hazırlıq iclası keçirildi.
Hakim C.Yusifov bildirdi ki, digər cavabdeh Qoşqar Bakılıya da çağırış vərəqi göndərilsə də, o, iştirak etmir. V.Hüseyn isə bildirdi ki, Q.Bakılı ştatdankənar müəllif kimi fəaliyyət göstərir.
Hakim iddianın icraata qəbul olunduğunu bildirdi və prosesi 13 iyul saat 15:00-a təyin etdi.
Əlavə edək ki, hakim Reportyorların Azadlıq və Təhlükəsizlik İnstitutunun (RATİ) əməkdaşlarına foto-videoçəkiliş aparmağa icazə verməyib.
Qeyd edək ki, iddiaya “Yeni Müsavat”ın bu il yanvarın 05-də işıq üzü görən sayında “Prezidentin narazı qaldığı obyektin sahibi tapıldı, “Bakı” mehmanxanası Cəlal Əliyevin imiş” başlıqlı məqalə səbəb olub.
Xatırladaq ki, Cəlal Əliyev sözügedən məqalələrə görə bir müddət əvvəl də Nizami rayon məhkəməsində Cinayət Məcəlləsinin 147-ci (böhtan) və 148-ci (təhqir) maddələri ilə xüsusi ittiham qaydasında iddia qaldırmışdı. 10 fevral 2010-cu il tarixində hakim Ziya Əliyev iddia ərizəsinin düzgün hazırlanmamasını əsas göstərək, iddianın icraata götürülmədən rədd edilməsi barədə qərar çıxarmışdı. İddiaçı bu qərardan apellyasiya şikayəti versə də, bu il mayın 4-də apellyasiya şikayətini geri götürmüşdü.
Azərbaycanın ən çoxtirajlı qəzetlərindən olan “Yeni Müsavat” qəzeti 1993-cü ildən fəaliyyət göstərir və gündəlik çap olunur.