Bu gün (8 iyun) Reportyorların Azadlıq və Təhlükəsizlik İnstitutunun (RATİ) mətbuat mərkəzində mətbuat yayımı ilə məşğul olan bir qrup şəxs mətbuat satışına qadağa qoyulması ilə bağlı mətbuat konfransı keçirib.
“Prezidentin 50 saylı sərəncamına əsasən, qanuni olaraq fərdi sahibkarlıqla – səyyar qəzet satışı ilə məşğuluq. Bakı şəhər Ticarət Departamentinə ayda 61 manat dövlət rüsumu ödəyirik. Son olaraq, mayın 28-də 1 aylıq lisenziya almışıq, iyunun 1-dən isə bizə qəzet, jurnal satmağa imkan vermirlər və deyirlər ki, guya həmin sərəncam ləğv edilib. Nizami küçəsi və Fəvvarələr meydanında bir neçə aydır təmir işləri getdiyi halda, biz öz fəaliyyətimizə ara verməmişik. Təmirin başa çatdığı bir ərəfədə isə gəliblər ki, guya bizə başqa ərazidə yer verəcəklər. Artıq bir həftə keçməsinə baxmayaraq, hələ də bizə yer verilməyib” – deyə Arif Əsgərov vurğuladı.
Tədbirdə çıxış edən mətbuat satışı ilə məşğul olan digər şəxslər də, qoyulmuş qadağaya son verilməyəcəyi təqdirdə etiraz aksiyaları keçirəcəklərini, hüquqlarının bərpası üçün məhkəmədə iddia qaldıracaqlarını və nəticəsi olmazsa, özlərini yandıracaqlarını vurğulayıblar.