Martın 28-də Azərbaycan Televiziya və Radio Verilişləri Qapalı Səhmdar Cəmiyyətinin (AzTV) sabiq əməkdaşı, jurnalist Asəf Quliyev Avropa Məhkəməsinə şikayət verib.
O, AZTV-də çalışanlarla qısamüddətli (1, 2, 3 aylıq) əmək müqavilələri bağlanması praktikasında jurnalistlərin ifadə azadlığı hüququnun məhdudlaşdırılması barədə şikayət edib.
Jurnalistin hüquqlarını müdafiə edən Media Hüququ İnstitunun yaydığı məlumata görə, o 2010-cu ilin iyulunda əmək müqaviləsi uzadılmadığından AzTV-dəki işindən çıxarılıb. Bunu qanunsuz sayıb məhkəməyə müraciət edən jurnalist ölkədaxili məhkəmələrin qərarlarından narazı qalıb. Jurnalist hesab edir ki, milli məhkəmələrin qərarları onun Azərbaycan qanunvericiliyində, eləcə də Avropa Konvensiyasında nəzərdə tutulmuş hüquq və azadlıqlarına müdaxilə təşkil edib.