Bu gün taksi sürücülərinin Nəqliyyat Nazirliyi qarşısında keçirdiyi etiraz aksiyası zamanı “Turan” informasiya agentliyinin əməkdaşı Etimad Budaqov təzyiqə məruz qalıb.
Qeyd edək ki, bir qrup taksi sürücüsü bu gün (16 yanvar) Nəqliyyat Nazirliyinin binası önündə etiraz aksiyası keçiriblər. Onlar fəaliyyət göstərdikləri sahədə qaydaların sərtləşdirilməsindən narazılıqlarını ifadə ediblər.
Lakin polis aksiyanın qarşısını alıb, nəticədə zərərçəkmişlər bir neçə nəfər saxlanılıb. Bundan sonra bir neçə nəfər Nəqliyyat Nazirliyinə dəvət olunub. Onları NN-nin ictimaiyyətlə əlaqələr şöbəsinin müdiri Namiq Həsənov qəbul edib. Həsənov narazı sürücülərə 2 gün ərzində cavab veriləcəyini deyib.
Xatırladaq ki, yanvarın 13-də Nəqliyyat Nazirliyi və DİN lisenziyasız və buraxılış ili 2006-cı ilə qədər olan avtomobillərdə işləyən taksi sürücülərini aşkar etmək məqsədilə reydlər keçirməyə başlayıb. Həmin sürücülərə taksi xidməti göstərməyə imkan verilmir.