“Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru, məhbus jurnalist Eynulla Fətullayev Azərbaycan Respublikasının Baş Prokuroru Zakir Qaralova rəsmi müraciət edib. Bu barədə bu gün (15 fevral) Reportyorların Azadlıq və Təhlükəsizlik İnstitutuna (RATİ) baş redaktorun vəkili Anar Qasımov məlumat verib.
Vəkil onu da qeyd etdi ki, Ədliyyə Nazirliyi məhbus jurnalist Eynulla Fətullayevin nazir Fikrət Məmmədova ünvanladığı məktuba reaksiya verib: “Penitensiar xidmətin əməkdaşı Bakı İstintaq Təcridxanasında saxlanılan Eynulla Fətullayevlə görüşüb. Lakin məlum müraciətlə bağlı araşdırmalar aparıldığından, görüşün təfərrüatları barədə mətbuata məlumat verilmir”.
Habelə A.Qasımov Eynulla Fətullayevin müxtəlif səpkili hədələr almasını ona bildirdikdən sonra bu barədə təcridxana rəhbərliyinə müraciət etdiyini də dedi: “Fevralın 12-də təcridxana rəhbərliyinə rəsmən müraciət etdim. Hazırda bu istiqamətdə araşdırma gedir”.
Qeyd edək ki, Eynulla Fətullayev, Penitensiar Xidmətin sabiq rəisi Nazim Ələkbərova və Bakı İstintaq Təcridxanasının rəisi Elxan Sadıqova müraciət ünvanlanmışdı. Eynulla Fətullayev yaxın vaxtda Bakı İstintaq Təcridxanasından cəzaçəkmə müəssisəsinə köçürülməli olduğunu xatırladıb, bir sıra cəzaçəkmə müəssisəsində onun həyatı üçün real təhlükələrin gözləndiyi barədə məlumat verib və Cəzaların İcrası Məcəlləsinin müvafiq maddələrinə istinad edərək məhkəmə və hüquq-mühafizə orqanlarının sabiq işçilərinin saxlandığı 9 saylı cəzaçəkmə müəssisəsinə göndərilməsini xahiş edib.
Xatırladaq ki, Fətullayevə qarşı 2009-cu ilin dekabrın 29-da saxlanıldığı 12 saylı Cəzaçəkmə Müəssisəsində saxta narkotik ittihamı ilə cinayət işi başlanmışdı və 06 iyul 2010-cu il tarixində Eynulla Fətullayev Cinayət Məcəlləsinin 234.1-ci maddəsi ilə (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) təqsirli bilinərək, 2 il 6 ay müddətinə azadlıqdan məhrum edilib və hökmün icrası elan edildiyi gündən hesablanır. Bu hökm 29 dekabr 2009-cu ildə 12 saylı Cəzaçəkmə Müəssisəsində Fətullayevin üzərindən 0,223 qram heroin tapılması ilə bağlı irəli sürülmüş ittiham üzrə çıxarılıb. İş üzrə verilmiş apellyasiya şikayəti təmin olunmayıb.
Habelə Eynulla Fətullayev 2007-ci ildə terrorla hədələmə və digər ittihamlarla 8 il 6 ay müddətinə azadlıqdan məhrumetmə cəzasına məhkum edilib. Lakin Avropa İnsan Hüquqları Məhkəməsi isə 2010-cu il aprelin 22-də yuxarıda qeyd edilən cinayət işləri ilə bağlı qərar qəbul etmişdi. Qərarda bildirilir ki, jurnalist dərhal azadlığa buraxılmalı və Azərbaycan dövləti ona 27 min 822 avro məbləğində təzminat ödəməlidir. Ali Məhkəmənin Plenumu isə bu qərarı qismən təmin edib.