Bu gün (02 fevral) Bakı Apellyasiya Məhkəməsinin hakimi Natiq Abbasovun sədrliyi ilə “Televiziya və Alternativ Media İnkişaf Mərkəzi” İctimai Birliyinin qeydiyyatına alınmasından imtina ilə bağlı verilən iddianın geri qaytarılması haqqında qərardaddan verilən şikayətə baxılıb. Hakim şikayəti təmin edib və sənədləri baxılması üçün Yasamal rayon Məhkəməsinə göndərib.
Adı çəkilən təşkilatın qeydiyyatından 5 dəfə imtina etdiyinə görə təsisçilər Rəsul Cəfərov və Əhməd Heybətov Ədliyyə Nazirliyinə qarşı iddia ilə müraciət etmişdilər. Yasamal Rayon Məhkəməsinin hakimi Fuad Talışınski isə iddia ərizəsinin geri qaytarılması barədə qərarda çıxarmışdı. Qərardad əsassız olduğundan təşkilatın təsisçiləri apellyasiya şikayəti vermişdilər.
Xatırladaq ki, “Televiziya və Alternativ Media İnkişaf Mərkəzi” İctimai Birliyi 2009-cu ilin avqustunda təsis edilsə də, Ədliyyə Nazirliyinin imtinaları səbəbindən indiyə kimi dövlət qeydiyyatına alınmayıb.