DEPUTATlIN İDDİASI İLƏ JURNALİST 20 MİN MANAT MƏBLƏĞİNDƏ CƏRİMƏ EDİLDİ

dekabr 14th, 2010
Bu gün (14 dekabr) Masallı rayon Məhkəməsində hakim Nemət Musayevin sədrliyi ilə Milli Məclisin deputatı Novruzəli Aslanovun  "Tribuna" İnformasiya Agentliyinin (www.tia.az) baş redaktoru Əlişir Əhədə qarşı qaldırdığı iddia qismən  təmin edilib. Bu barədə   Reportyorların Azadlıq və Təhlükəsizlik İnstitutuna (RATİ) Əlişir Əhədin özü məlumat verib.

Belə ki,  hakim N.Musayev  Əlişir Əhədin 20 min manat məbləğində cərimə edilməsi  barədə qərar verib. Ə. Əhəd qeyd etdi ki, baş redaktor olduğu saytın bu məbləği ödəmək imkanı yoxdur və  hakimin bu qərarından apellyasiya şikayəti verəcək.

Xatırladaq ki, deputat Novruzəli Aslanov  13 noyabr 2010-cu il tarixində  "Tribuna" İnformasiya Agentliyinin  (tia.az) saytında gedən “86 saylı dairədə daş qayaya rast gəlib” başlıqlı yazıda onun şərəf və ləyaqətinin  təhqir edildiyini əsas gətirərək, Cinayət Məcəlləsinin 147.1-ci maddəsi ilə jurnalistin cəzalandırılması və 20 000 (min) manat məbləğində cərimə edilməsi tələbi ilə məhkəməyə müraciət etmişdi.