Bu gün (14 dekabr) Bakı Apellyasiya Məhkəməsində hakim İlqar Hüseynovun sədrliyi ilə jurnalist Gülnaz Qənbərlinin “Sevinc Osmanqızının jurnalı” jurnalının baş redaktoru Sevinc Osmanqızına (Mirzəyeva) qarşı iddiasına əsasən apellyasiya şikayətinə baxılıb. Hakim İ. Hüseynov şikayətin təmin edilməməyi barədə qərar verib.
Gülnaz Qənbərlinin vəkili Elmar Süleymanov Reportyorların Azadlıq və Təhlükəsizlik İnstitutuna (RATİ) hakimin bu qərarının ədalətli olmadığını və bu qərardan kassasiya şikayəti verəcəklərini bildirdi.
Qeyd edək ki, jurnalist Gülnaz Qəmbərli 2009-cu ilin aprel ayından oktyabr ayınadək “Sevinc Osmanqızının jurnalı”nda işlədiyini, amma işdən çıxdıqdan sonra baş redaktor Sevinc Osmanqızı bu barədə onun əmək kitabçasında qeyd aparmaqdan imtina etdiyini iddia edərək məhkəməyə müraciət edib. 27 iyul 2010-cu il tarixində Yasamal rayon Məhkəməsi iddianın təmin edilməməyi barədə qərar çıxardıqdan sonra G. Qənbərli qərardan apellyasiya şikayəti verib.