Dünən (9 iyul) Abşeron rayon Polis Şöbəsində tanınmış jurnalist Mahal İsmayıloğlundan verilmiş şikayət üzrə istintaq hərəkətləri davam etdirilib.
İstintaq zamanı döyüldüyünü iddia edən qadınla M. İsmayıloğlu arasında üzləşmə aparılıb, habelə şahidlərin ifadəsi alınıb. Bu barədə RATİ-yə məlumat verən M. İsmayıloğlu ona Nəsibə adlı qadın tərəfindən şər atıldığını deyir: ”Üzləşmədə qadın israrla döyüldüyünü deyirdi. Guya bu ikinci hadisədir ki, mən onu döyürəm. Ən gülüncü isə odur ki, guya mən onu döyən zaman onu tanımadığı, yad adamlar xilas ediblər. Ancaq bu iddia tam yalan şər və böhtandır”.
M. İsmayıloğlunun sözlərinə görə, şahid qismində ifadə verən bağ qonşuları Nəsibə adlı qadının kimsə tərəfindən döyülməsi faktını görmədiklərini bildiriblər. Buna baxmayaraq jurnalist hesab edir ki, onun həbsi barədə sifariş var və onu bu yolla şərləyərək həbs etmək istəyirlər.
Xatırladaq ki, M.İsmayıloğlu bağ qonşusu olan Daxili İşlər Nazirliyinin əməkdaşı Vahid İmanovun ona qarşı olan şikayəti əsasında iyunun 27-də polisə çağırılmışdı. Şikayətə səbəb guya jurnalistin qonşusunun qulluqçusunu zibili onun qapısına tökdüyünə görə döyməsi olub. Bu səbəbdən İsmayıloğluna qarşı Cinayət Məcəlləsinin 221.3-cü maddəsi (silah və ya silah qismində istifadə edilən əşyalar tətbiq edilməklə törədilən xuliqanlıq) ilə cinayət işi açılıb.
Qeyd edək ki, Mahal İsmayıloğlu uzun illər rəsmi dövlət qəzeti – Prezidentin İcra Aparatının orqanı olan "Xalq qəzeti"ndə baş redaktor vəzifəsində çalışıb. 2002-ci ildə vəzifəsindən uzaqlaşdırılıb. Hal-hazırda "Yeni Müsavat" qəzetində köşə yazıları ilə çıxış edir.