Bu gün (22 noyabr) Masallı rayon Məhkəməsində hakim Nemət Musayevin sədrliyi ilə 07 noyabr parlament seçkilərinin Mərkəzi Seçki Komissiyası Tərəfindən elan edilmiş nəticələrə görə qalib gəlmiş Novruzəli Aslanovun "Tribuna" İnformasiya Agentliyinin (www.tia.az) baş redaktoru Əlişir Əhədə qarşı iddiasına əsasən məhkəmə hazırlıq iclası keçirilib. Bu barədə Reportyorların Azadlıq və Təhlükəsizlik İnstitutuna (RATİ) Əlişir Əhədin özü məlumat verib.
Onun bildirdiyinə görə, məhkəmənin vaxtı barədə ona gec məlumat verildiyindən, prosesdə iştirak edə bilməyib və bu barədə sonradan məlumat əldə edib. Hakim işi icraata qəbul edib və məhkəmə dekabrın 2-si saat 11:00-a təyin edilib.
Xatırladaq ki, deputat Novruzəli Aslanov 13 noyabr 2010-cu il tarixində "Tribuna" İnformasiya Agentliyi (tia.az) saytında gedən “86 saylı dairədə daş qayaya rast gəlib” başlıqlı yazıda onun şərəf və ləyaqətinin təhqir edildiyini əsas gətirərək, Cinayət Məcəlləsinin 147.1-ci maddəsi ilə jurnalistin cəzalandırılması və 20 000 (min) manat məbləğində cərimə edilməsi tələbi ilə məhkəməyə müraciət edib.