“Mən Vasif Məhərrəmlinin həbs olunmasını istəyirəm”. Bu sözləri RATİ-ə “ANS PRESS”-in müxbiri Vüqar Kamiloğlu deyib.
Kamiloğlu RATİ-nin əməkdaşı ilə söhbətində onu da bildirib ki, artıq faktla bağlı Yasamal rayon Polis İdarəsində (RPİ) Cinayət Məcəlləsinin 221.1-ci (xuliqanlıq) maddəsi ilə cinayət işi qaldırılıb və iş müstəntiq Anar Məmmədovun icraatındadır. Jurnalist eyni zamanda tibbi ekspertizadan da keçdiyini və ekspertizanın rəyinin Yasamal RPİ-ə göndərildiyini bildirib.
Məsələ ilə bağlı RATİ əməkdaşları Yasamal RPİ-nin müstəntiqi Məmmədovla əlaqə saxlamaq istəsələr də, müstəntiq telefon zənglərimizə cavab verməyib.
Xatırladaq ki, dekar ayının 1-də “ATV” telekanalında yayımlanan “EL içində” verilişinin çəkiliş prosesində “ANS PRSS”-in müxbiri Vüqar Kamiloğlu ilə müxənni Vasif Məhərrəmli arasında mübahisə baş verib. Mübahisə nəticəsində V.Məhərrəmli jurnalistin üzərinə hücum çəkərək ona üz nahiyəsindən yumruqlarla zərbələr endirib.