Ötən həftə Səbail rayon Məhkəməsi jurnalist Yafəs Həsənovun Daxili İşlər Nazirliyi (DİN) ilə bağlı verdiyi şikayət ərizəsini geri qaytarıb. Bu barədə bu gün (14 fevral) Reportyorların Azadlıq və Təhlükəsizlik İnstitutuna (RATİ) Y. Həsənov məlumat verib.
Y. Həsənovun sözlərinə görə, məhkəmədən ona təqdim edilən cavabda işin dövlət qurumu ilə əlaqəli olması səbəbindən inzibati məhkəməyə göndərilməsi məsləhət görülüb.
Xatırladaq ki, Y. Həsənov 2010-cu ilin oktyabrında yaşadığı Naxçıvan Muxtar Respublikasında jurnalist fəaliyyətinə əsasən təzyiq və təqiblərə məruz qaldığını bildirərək, DİN-ə müraciət etmişdi. DİN-nin onun müraciətinə laqeyd münasibət göstərdiyini bildirən Y. Həsənov Səbail rayon Məhkəməsinə şikayət ərizəsi ilə müraciət etsə də, məhkəmə şikayət ərizəsini geri qaytarıb.