ALİ MƏHKƏMƏ DƏ JURNALİSTİN ŞİKAYƏTİNİ TƏMİN ETMƏDİ

fevral 14th, 2011
 

 Fevralın 11-də Ali Məhkəmədə hakim Əli Rüstəmovun sədrliyi ilə jurnalist Yaşar Ağazadənin sel fəlakəti ilə əlaqədar olaraq yaradılmış Hökumət Komissiyasına qarşı informasiya sorğusunun cavablandırılmamasına dair  Apellyasiya Məhkəsinin  qərarından verdiyi kassasiya şikayətinə baxılıb.

Bu barədə bu gün (14 fevral)  Reportyorların Azadlıq və Təhlükəsizlik İnstitutuna (RATİ) “Media Hüququ” İnstitutunun vəkili Xalid Ağəliyev məlumat verib.

Onun sözlərinə görə, məhkəmə Hökumət Komissiyasına qarşı olan şikayətin təmin edilməməyi barədə qərarını elan edib. X. Ağəliyev onu da bildirdi ki, məhkəmənin bu qərarından Avropa Məhkəməsinə şikayət hazırlanacaq.

Xatırladaq ki, jurnalist Yaşar Ağazadə 2010-cu ilin iyulunda təbii fəlakətlə bağlı yaradılmış Hökumət Komissiyasının sədri Artur Rəsizadəyə informasiya sorğusu ilə müraciət edərək, təbii fəlakətdən zərərçəkmiş şəxslərə veriləcək kompensasiyaların məbləğini müəyyən edən sənədlərin, kompensasiyaların ödənilməsi ilə bağlı hesabatların, icra hakimiyyəti qurumlarının fəlakətlə bağlı qəbul etdiyi digər aktların surətlərinin ona verilməsini xahiş etsə də, bunun nəticəsi olmayıb. Səbail rayon Məhkəməsi 2010-cu ilin  avqust ayında iddianın təmin edilmədiyi barədə qərar çıxarıb. Bakı Apellyasiya Məhkəməsi də 2010-cu ilin oktyabr ayında apellyasiya şikayətinin təmin etməyib.