Quba hadisələrinə görə həbsdə olan “Xəyal” TV-nin Bakı İstintaq Təcridxanasında saxlanılan icraçı direktoru Vüqar Qonaqov və baş redaktor Zaur Quliyev hədələnərək təhqir və təzyiqlərə məruz qalırlar. Bu barədə bu gün (16 oktyabr) Reportyorların Azadlıq və Təhlükəsizlik İnstitutuna (RATİ) Zaur Quliyevin vəkili Elçin Sadıqov məlumat verib.
“Jurnalistlər bildiriblər ki, onlara fiziki və mənəvi işgəncələr verilərək tələb edilir ki, hüquqlarını müdafiə edən vəkillərdən imtina etsinlər. İstintaqın jurnalistlərə olan təzyiqini qanunsuz əməl hesab edirəm və tərəfimizdən bu barədə aidiyyatı qurumlara müraciət ediləcək”, – deyə vəkil bildirib.
Qeyd edək ki, “Xəyal” TV-nin Bakı İstintaq Təcridxanasında saxlanılan icraçı direktoru Vüqar Qonaqov həbsi müddətində ona verilən fiziki və mənəvi işgəncələri əks etdirən məktubu “Azadlıq” qəzetinə ünvanlayıb. Jurnalist saxlanıldığı təcridxana rəhbərliyi tərəfindən daim işgəncələrə məruz qaldığını və nəticədə səhhətində yaranan problemlərə və müalicəsinə rəhbərlik tərəfindən laqeyd münasibət göstərildiyini qeyd edib: “Martın 17-də gecə saatlarında hərarətim çox yüksəlmişdi. Vəziyyətim ağırlaşırdı. 3 gün orada saxlandığım müddətdə bir dəfə də dərman verilmədi. Dəfələrlə rəis Göyüş Quliyevdən xahiş etsəm də, nə həkim çağırıldı, nə də ki dərman verildi. Martın 18-də General Mirqafar Seyidovun otağına aparıldım. Otağında DİN Baş İstintaq İdarəsinin rəisi Arzu Daşdəmirov da var idi. Məni hədələyirdilər ki, hər şey ortadadır, öz xoşumla etiraf edim”, – deyə qeyd edən məhkum əks təqdirdə cinsi zorakılığa məruz qalacağ ilə hədələndiyini yazır.
” Arzu Daşdəmirov mənə dedi ki, heç vaxt həbsdən çıxmayacağam. Nəşə atıb, min-bir bəhanə ilə məni həbsdə saxlayacaqlar. O həmçinin bu dəfə çağırılmağımın axırıncı şans olduğunu dedi. Mən bu hədə qorxular, təzyiqlər altında ifadə verməyə məcbur edilirdim. Mirqafar Seyidovun tapşırığına əsasən, mən vəkilim Elçindən imtina etməli idim. Həmin gün məni vəkildən imtina etməyə məcbur etdilər və ərizə yazdırdılar”.
Xatırladaq ki, Quba rayonun sabiq icra başçısı Rauf Həbibovun 2011-ci ilin yekunlarına dair müşavirədə səsləndirdiyi və sonra sosial şəbəkələrdə yayılan çıxışında “Qubalılar öz ailə uşaqlarını, vətənini 30-40 mata satırlar” ifadəsi rayon əhalisini hiddətləndirib və bu səbəbdən 2012-ci il mart ayının 1-də Quba rayonunda kütləvi etiraz aksiyası keçirilib, aksiya iştirakçıları R. Həbibovun evini yandırıblar, əhali ilə polis və daxili qoşun hissələri əsgərləri arasında qarşıdurma olub. Qarşıdurma nəticəsində icra başçısı Prezident İlham Əliyev tərəfindən vəzifəsindən çıxarılıb. 13 mart tarixində "Xəyal TV"-nin icraçı direktoru Vüqar Qonaqov və baş redaktoru Zaur Quliyev, habelə 20 nəfərə yaxın Quba sakini həbs edilib. Hazırda həbsdə olan ilk 8 nəfərin məhkəməsi Quba şəhər məhkəməsində davam edir.