Bu gün DİN-in xüsusi tədqiqat inspektoru Rza Pənahovun qəbulunda olan “Yüksəliş naminə” qəzetinin müxbiri E.Həsənov RATİ-yə bildirib ki, onun dekabrın 14-də Səbail rayon 39-cu Polis bölməsinin polisləri tərəfindən fiziki zorakılığa məruz qalması ilə əlaqədar prezidentin şəxsi elektron ünvanına yazdığı şikayətə baxılır.
Belə ki, şikayət ərizəsi xüsusi araşdırılması üçün DİN-ə göndərilib. DİN-də R.Pənahov E.Həsənovdan izahat alıb və bildirib ki, məsələ araşdırıldıqdan sonra nəticə barədə ona məlumat veriləcək.
Xatırladaq ki, "Yüksəliş naminə" qəzetinin müxbiri Elçin Həsənov.14 dekabr 2007-ci il tarixində "Azadlıq" qəzetinin baş redaktoru Q.Zahidovun qanunsuz tutulmasına və ölkədə azad sözün boğulmasına etiraz piketini jurnalist kimi işıqlandırarkən polis tərəfindən döyülüb. Jurnalist bildirmişdi ki, o Səbail rayon 39-cu polis bölməsinə gətirilib və orada təhqirlərə məruz qalıb. Bununla əlaqədar olaraq, Həsənov prezidentin şəxsi elektron ünvanına və Səbail Rayon Məhkəməsinə müraciət etmişdi.