Martın 11-də bir qrup gəncin “Facebook” sosial şəbəkəsi vasitəsilə hökumət əleyhinə təşkil etdikləri “Böyük Xalq Günü” aksiyası ilə bağlı Azərbaycanın paytaxtı Bakı şəhərində fövqəladə vəziyyət yaşandı. Səhər saatlarından etibarən bütün ali və orta təhsil müəssisələri, metro stansiyalarının çıxışları, şəhərin bütün mərkəzi meydanları polis nəzarətinə götürülmüşdü.
Gənclərin keçirdikləri etiraz aksiyası zamanı dəmir yolu vağzalı ərazisində polis tərəfindən “Azadlıq” radiosunun fotomüxbiri Abbas Atilayıya təzyiq edilib. Nizami (keçmiş Torqovıy) küçəsində isə polislərdən biri “Turan” informasiya agentliyinin fotoreportyoru, əynində jurnalist olduğunu göstərən gödəkçə olan Etimad Budaqovun qarın nahiyəsinə zərbə endirib.