“GÜZGÜ” QƏZETİNİN ƏMƏKDAŞIN APELYASİYA ŞİKAYƏTİ ÜZRƏ MƏHKƏMƏ PROSESİ KEÇİRİLİB

iyun 6th, 2011
Bu gün (6 iyun) Sumqayıt Apellyasiya Məhkəməsində hakim Vidadi Cəfərovun   sədrliyi ilə Abşeron rayon Ceyranbatan qəsəbəsinin bir qrup sakininin – İdris Zeynalov və İmran Novruzovun Cinayət Məcəlləsinin 127-ci (qəsdən sağlamlığa az ağır zərər vurma) və 221-ci (xuliqanlıq) maddələri ilə “Güzgü” qəzetinin müxbiri Kamran Bəyəliyevə (Səxavət) qarşı irəli sürdükləri ittiham  üzrə Qubadlı rayon Məhkəməsinin 02 noyabr 2010-cu il tarixli qərarından verdiyi apellyasiya şikayəti üzrə məhkəmə prosesi keçirildi.

Məhkəmənin nəzarət buraxılış məntəqəsindən prosesi müşahidə etmək istəyən Reportyorların Azadlıq və Təhlükəsizlik İnstitutunun (RATİ) əməkdaşlarına hakimin çəkiliş qrupunun içəri daxil olmasına icazə vermədiyi bildirildi.

Prosesdən sonra isə K. Bəyəliyev RATİ-yə bildirdi ki, onun hüquqlarını müdafiə edən vəkili Vüqar Xasayevə vaxtında məhkəmə bildirişi daxil olmadığından və vəkilin məhkəmənin keçirilmə günündən xəbərsiz olması səbəbindən o   prosesdə iştirak edə bilməyib və bu səbəbdən də  hakim V. Cəfərov növbəti prosesi 17 iyun saat 10:30-a  təxirə salıb.

Xatırladaq ki,  2009-cu il sentyabr ayının 11-də axşam saat 11 radələrində  “Güzgü” qəzetinin müxbiri Kamran Bəyəliyev ilə Ceyranbatan qəsəbəsinin girişində  Bakı-Sumqayıt magistral yolun üstündə  Sabir Qafarova məxsus kafeni icarəyə götürmüş İdris Zeynalov və İmran Novruzov  arasında mübahisə yaranıb. Mübahisə  icarədarların K.Bəyəliyevdən işlətdikləri kafe barədə yazıları  dayandırmağı tələb etmələri ilə başlanıb.  Baş verən hadisə ilə bağlı K.Bəyəliyev haqqında məhkəməyə şikayət edilib. Məhkəmə Bəyəliyev barədə 1 il müddətinə şərti həbs cəzası hökmü çıxarıb.

“Güzgü”  qəzeti 1992-ci il iyul ayının 22-dən ayda 1 və ya 2 dəfə çap olunan iqtidaryönlü satirik nəşrdir.