Bu gün (29 oktyabr) Ağır Cinayətlərə Dair İşlər üzrə Hərbi Məhkəmənin hakimi İslam Nemanov bir qrup jurnalistin açıq keçirilən məhkəmə prosesində iştirakına icazə verməyib və onları əsassız olaraq zaldan çıxarılmasına göstəriş verib.
Bu barədə Reportyorların Azadlıq və Təhlükəsizlik İnstitutuna (RATİ) “Bizim Yol” qəzetinin əməkdaşı Hacı Zeynalov məlumat verib. Jurnalistin sözlərinə görə, “Azadlıq” qəzetinin əməkdaşı Aytən Məmmədova, “Yeni Müsavat” qəzetinin müxbiri Elşən Balaxanlı (Məmmədov) və özü Azərbaycanın Müdafiə Nazirliyinin Hərbi Hava Qüvvələri və Hava Hücumundan Müdafiə Qoşunlarının keçmiş komandanı Rail Rzayevin qətli ilə bağlı cinayət işi üzrə keçirilən məhkəmə prosesində iştirak etmək istəsələr də, buna şərait yaradılmayıb.
“Proses başladıqdan sonra hakim bizim kimliyimizlə maraqlandı. Biz jurnalist olduğumuzu bildirdik və vəsiqələrimizi təqdim etdik. Bundan sonra heç bir səbəb göstərmədən bizi məhkəmə zalından uzaqlaşdırdılar”, – deyə H.Zeynalov vurğuladı.
Xatırladaq ki, Müdafiə nazirinin müavini, Hərbi Hava Qüvvələri və Hava Hücumundan Müdafiə Qoşunlarının komandanı, general-leytenant Rail Rzayev fevralın 11-i səhər saatlarında Bakıda odlu silahla qətlə yetirilib.