Bu gün (25 fevral) Səbail Rayon Məhkəməsində hakimi Elnur Həsənovun sədrliyi ilə “Müxalifət” qəzetinin baş redaktoru və qəzetin şöbə redaktoru Yaşar Ağazadənin Ədliyyə Nazirliyinə, Ədliyyə nazirliyinin Penitensiar Xidmətinə və 1 saylı İstintaq Təcridxanasına qarşı, həbsdə saxlanma şəraitinin qanunsuz hesab olunmasına dair qaldırdıqları iddia üzrə məhkəmə prosesi keçirilib.
Proses iddiaçıların ötən məhkəmə prosesində verdikləri vəsatətlə əlaqədar 1 saylı İstintaq Təcridxanasında keçirilib.
Y. Ağazadənin Reportyorların Azadlıq və Təhlükəsizlik İnstitutuna (RATİ) verdiyi xəbərə görə, 1 saylı İstintaq Təcridxanasına baxış keçirərkən onların saxlandığı 35 və 37 nömrəli kameraların təmir olunması və yeni yataq dəstləri ilə təmin edilməsi məlum olub.
RATİ əməkdaşları da 1 saylı İstintaq Təcridxanasına keçirilən baxışda iştirak etmək üçün məhkəməyə müraciət etmişdir. Lakin hakim E. Həsənov Azərbaycan Respublikası Mülki Prosessual Məcəlləsinin (MPM) 79-cu maddəsini əsas gətirərək baxışda yalnız tərəflərin iştirak etməsinin mümkün olduğunu bildirib.
Qeyd edək ki, 16 fevral 2009-cu il tarixində keçirilmiş məhkəmə prosesində iddiaçılar R. Kəbirli və Y. Ağazadə vəsatətlə çıxış edərək, məhkəmədən 1 saylı İstintaq Təcridxanasına baxış keçirməyi, orada saxlanılan şəxslərin siyahısını öyrənməyi, saxlanma kameralarının fotoşəkillərini çəkməyi, kameraların ölçü və sxemi ilə yerində baxış keçirilərək tanış olmağı xahiş etmişdilər.