“Eynulla Fətullayev barədə qəbul etdiyimiz qərar jurnalistlərin şişirtmələrinə görə müzakirələrə şərhlərə səbəb olub. Bizim qərarımız var, Qaradağ rayon Məhkəməsinin Eynulla Fətullayev barədə çıxardığı qərarı dəyişdirmədən qüvvədə saxlanılıb”. Bunu Bakı Apellyasiya Məhkəməsində jurnalist Eynulla Fətullayevin şikayətinə baxmış hakim Mirpaşa Hüseynov “Media forum” xəbər saytına deyib.
Qeyd edək ki, yanvarın 25-də iş saatı bitdikdən sonra hakim Mirpaşa Hüseynovun sədrliyi ilə Bakı Apellyasiya Məhkəməsi ciddi qanun pozuntuları ilə “Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru Eynulla Fətullayevin Qaradağ rayon Məhkəməsinin haqqında çıxardığı həbs qərardan verdiyi apellyasiya şikayətini rədd edən qərar verib. Cəza Qaradağ rayon Məhkəməsinin hökm çıxardığı gündən, yəni 2010-cu il iyulun 6-dan hesablanır. Eyni zamanda proses zamanı Eynulla Fətullayevə və onun vəkili Anar Qasımova çıxışı üçün imkan yaradılmayıb, prosesdə jurnalistlərə audio yazı, foto və video çəkiliş üçün imkan verilməyib.
Xatırladaq ki, Eynulla Fətullayev 2007-ci ildə terrorla hədələmə və digər ittihamlarla 8 il 6 ay müddətinə azadlıqdan məhrumetmə cəzasına məhkum edilib. Lakin Avropa İnsan Hüquqları Məhkəməsi isə 2010-cu il aprelin 22-də yuxarıda qeyd edilən cinayət işləri ilə bağlı qərar qəbul etmişdi. Qərarda bildirilir ki, jurnalist dərhal azadlığa buraxılmalı və Azərbaycan dövləti ona 27 min 822 avro məbləğində təzminat ödəməlidir. Ali Məhkəmənin Plenumu isə bu qərarı qismən təmin edib. Hazırda isə jurnalist qondarma narkotik ittihamı ilə həbsdə saxlanılır.