Masallı rayon Məhkəməsinin 14 dekabr 2010-cu il tarixində Milli Məclisin deputatı Novruzəli Aslanovun "Tribuna" İnformasiya Agentliyinin (www.tia.az) baş redaktoru Əlişir Əhədə qarşı qaldırdığı iddiasına əsasən çıxarılan qərarda əsaslı dəyişikliklər edilib. Bu barədə bu gün (27 dekabr) Reportyorların Azadlıq və Təhlükəsizlik İnstitutuna (RATİ) Əlişir Əhədin özü məlumat verib.
“Qərarı oxuyarkən orada bir sıra dəyişikliklərin, yəni 10 000 (on min) manat cərimə və təkzib verilməsinin bildirildiyini gördüm. Halbuki, hakimin 14 dekabr 2010-cu ildə çıxardığı qərarda 20 min manat məbləğində cərimə edilməsi və təkzib verilərək üzr istənilməsini bildirmişdi”- deyə qeyd edən Ə.Əhəd qərarla bağlı tezliklə apellyasiya şikayəti veriləcəyini bildirdi.
Xatırladaq ki, deputat Novruzəli Aslanov 13 noyabr 2010-cu il tarixində "Tribuna" İnformasiya Agentliyinin (tia.az) saytında gedən “86 saylı dairədə daş qayaya rast gəlib” başlıqlı yazıda onun şərəf və ləyaqətinin təhqir edildiyini əsas gətirərək, Cinayət Məcəlləsinin 147.1-ci maddəsi ilə jurnalistin cəzalandırılması və 20 000 (min) manat məbləğində cərimə edilməsi tələbi ilə məhkəməyə müraciət etmişdi.