Ədliyyə Nazirliyi Seçki Monitorinq Mərkəzini (SMM) qeydiyyata almaqdan imtina edib. RATİ-yə daxil olan press-relizdə bildirilir ki, SMM-in təsisçiləri təşkilatın yenidən qeydiyyata alınması üçün 11 avqust 2008-ci il tarixində Ədliyyə Nazirliyinə müraciət ediblər.
Xatırladaq ki, Ədliyyə Nazirliyi Hüquqi Şəxslərin Qeydiyyatı İdarəsi Mülki Məcəllənin 59-cu (hüquqi şəxsin ləğvi) maddəsini rəhbər tutaraq SMM-in qeydiyyatı zamanı təsisçilər barədə səhv məlumat verdiyinə, Ədliyyə Nazirliyini xəbərdar etmədən regionlarda 8 nümayəndəlik yaratdığına və təşkilatın hüquqi ünvanı barədə yanlış məlumat verildiyini əsas gətirərək qurumun qeydiyyatını ləğv edən və təşkilatın fəaliyyətinə xitam verən qərarın çıxarılması tələbi ilə Xətai rayon Məhkəməsinə müraciət etmişdi. 14 may 2008-ci il tarixində Xətai Rayon Məhkəməsinin hakimi Tofiq Paşayevin sədrliyi ilə keçirilən prosesdə Ədliyyə Nazirliyinin iddiası təmin edilərək SMM-nin qeydiyyatının ləğv edilməsi və fəaliyyətinə xitam verilməsi barədə qərar qəbul edilmişdi. Xətai rayon Məhkəməsinin çıxardığı bu qərardan Apellyasiya şikayəti verilmişdi. Bu iş üzrə məhkəmə prosesi 25 noyabr 2008-ci il tarixində Bakı Apellyasiya Məhkəməsində hakim İsa İsmayılovun sədrliyi ilə məhkəmə baxışı keçiriləcək.